Gazteei hitza eman eta beren iritziak jasoko ditu Herri Hezitzaile dinamikak

Azpietian Herri Hezitzaile filosofiaren baitan, lanean jarraitzen du talde eragileak eta ikasturteko erronka berria aurkeztu dute gaur. Oraingoan, gazteetan jarriko dute arreta.

Herri Hezitzaileen ekimena herriko ikastetxeak, Udala eta herrigintzako eragileak biltzen dituen hezkuntza proiektua dela, eta iaz, bide horretan egindako herri mailako diagnostikoak, etorkizunera begira jarri eta eskuartean dituzten erronkak definitzeko balio izan zuen; balioen hezkuntzan sakontzea helburu duen filosofia herrian txertatzea da helburua.

Ikasturte hasieran, Eskola Kirolaren inguruko jardunaldia egin zuten, eta oraingoan, 12-16 urte bitarteko gazteengan jarri nahi dute arreta: "Adin-tarte horretako gazteek zer behar dituzte? Zeintzuk dira beraien interesak? Eta nahiak? Gazteen ahotsa entzun nahi dugu eta herrian subjektu aktibo izateko baliabideak eskaini" adierazi du Oihana Sudupe Gazte Informazio Bulegoko teknikariak.

12 eta 16 urte artekoentzat inkesta
Informazio hori jasotzeko, datozen hilabetetan garatuko den prozesu bat diseinatu dute. Prozesu horrek, bi fase izango ditu.

Lehenengoa, urte amaiera bitartean egingo dena izango da. Epealdi horretan, 12-16 urte bitarteko ikastetxe guztietako geletara joan eta gazte guztiei galdetegi bat betetzeko eskaintza egingo zaie, eta horrek, Azpeitiko gazteek bizi duten errealitatearen diagnostiko partekatua osatzea izango du helburu. Bertatik, beraien beharrak, interesak, nahiak eta herriarekiko pertzepzioak jasoko dira. Beren intereseko edo eguneroko gaien inguruko inkesta da: aisia, teknologia berriak, lokalak.... dituzte aztergai. Gainera, hainbat gazterekin kontrastatutako galdetegia da osatutakoa: "Elhuyarrek egingo du prozesuaren inguruko jarraipena eta haiekin inkesta osatu ostean, hainbat gazterekin kontrastatu genuen" zehaztu dute. Inkestak egitera Gaztelekuko hezitzaileak diren Ane Arenas eta Alex Altolagirre ari dira ikastetxeetan proiektuaren berri eman eta inkestak egiten laguntzen: "Gu joaten gara geletara, eta proiektu honetaz haratago, Gaztelekuaren bidez beraien proposamenak, kezkak eta bestelakoak bideratu ditzaketela jakitea ere nahi dugu", adierazi du Altolagirrek. Gainera eragin zuzena izan omen dute orain artean bisitek: "Gaztelekua ezagutzen ez zuten hainbat gaztek gelan izan eta segituan izena eman dute zerbitzuan, beraz, guretzat positiboa izaten ari da orain artean", gaineratu du Arenasek. 

Behin hori eginda, bigarren faseari helduko zaio urte berriarekin, egindako lanketa guztia gizarteratu eta gazteen arteko harreman-sareak sustatzeko: herriko gazteen topaketa bat egingo da. Jaialdi formatuko topaketa izango da eta bertan jarriko dira, etorkizunean elkarrekin lanean aritzeko harriak.

Udalaren konpromisoa

Behin inkestak egin eta gazteen topaketetan ondorioak aterata, Azpeitiko Udalak "gazteek dituzten beharrei heltzeko konpromisoa" duela adierazi du Leire Goenaga zinegotziak. "Gazteak prozesu honen parte izatea da guretzat garrantzitsua; parte izatea eta proiektu honen parte sentzitzea". Bide horretan Udalak eskaerak aintzakotzat hartuko dituela berretsi du.