Gazteen beharretara hobeto egokitzeko ahalegina

Gurasoen joan-etorriak bihurtu zuen ezohiko atzoko arratsaldea Gaztelekuan. Handitzeko obrak amaituta, espazioa nola geratu den ikusteko aukera eman zitzaien herritarrei, ate irekien bidez. Gazteriako teknikari eta hezitzaileek eta udal ordezkariek eman zizkieten xehetasunak bertaratuei. 80 metro koadroko espazioa gehitu zaio lehengo eremuari.

Azken urteotan nabarmen egin du gora Gaztelekuko erabiltzaileen kopuruak, eta behar berriak ekarri ditu horrek. Espazio ireki batek osatzen du orain ere Gaztelekua, eta aterik eta halakorik ez badago ere, erraz bereizten dira bi gune: lasaiagoa egoteko aukera ematen du batek (sofak,puffak…) eta dinamikoagoa da bestea (futbolina, xakea, ping-pong mahaia…).