Gaztetxoen beharrei erantzunez, Neguko Topalekua irekiko du udalak urtarrilaren 15ean

Datorren urtarrilaren 15etik apirilaren 2a bitartean gaztetxoentzako neguko topalekua irekiko du Azpeitiko Udalak, Azoka plazako beheko solairuan.  Iazko ikasturtean abian jarritako Haurren Kontseiluan udalari egindako eskaera izan zen neguan lagunekin elkartzeko aterpeko topaleku baten beharra, eta horri erantzunez irekiko da. Horretaz gain, urtarriletik maiatzera bitartean haurrekin filosofia modu ludikoan lantzeko ikastaroa ere eskainiko da; hilean behin larunbata arratsaldean. 

Urtarrilaren 15 eta 29an, otsailaren 5, 12 eta 26an, martxoaren 5, 12, 19 eta 26an eta apirilaren 2an irekiko da 16:30etatik 19:00ak bitartean Lehen Hezkuntzako 3. mailatik 6. mailara arteko haurrentzat. Topalekua haurren nahi eta beharretara egokituko da eta ekintza desberdinetara bideratutako txokoak izatea adostu zuten kontseiluan. Hala, bertan, udaleko Gazteria Zerbitzuko bi hezitzaile ere egongo dira; bertan egon nahi dutenek Azoka plazara joatea besterik ez dute izango, hau da, ez da aurrez izenik eman beharko. 

Gunea abian jartzean pixkanaka hartuko du izaera, eta joaten direnen behar eta nahietara egokitzen joatea da helburua. Gaztetxoen neguko topalekua aisialdirako gune berria da Azpeitian; Haurren Kontseiluaren ekimenez sortua. Proba gisa jarriko da abian, eta haurrekin lantzen joango da bertako dinamika.

Gune berri horretaz gain, abenduan, 0-8 urte bitarteko haurrentzako jolaserako gune estalia jarri zuen martxan udalak. Bertan haur txikienek jolastu, familian egon edo psikomotrizitatea lantzeko aukera eskaintzen da. 

Filosofia modu ludikoan lantzeko ikastaroa
Urtarriletik maiatzera bitartean, Jakinmin Praktika Filosofikoen Elkarteak haur filosofia modu ludikoan lantzeko saioak eskainiko ditu haurrentzat. Zehazki, sei saio eskainiko ditu; hilean behin, larunbata arratsaldean, 17:00etatik 18:30era bitartean izango dira saioak. Ikastaroa Lehen Hezkuntzako 4. mailatik 6.mailara arteko haurrei zuzenduta dago eta honako izango da ikastaroaren egutegia: urtarrilak 14, otsailak 4, martxoak 11, martxoak 25, apirilak 22 eta maiatzak 6. Saioak Basazabal Formazio Zentroan izango dira eta Jakinmin elkarteak zuzenduko ditu. Ikastaroan parte hartu nahi dutenek aurre izena eman beharko dute formularioa betez edo Udaleko Hezkuntza zerbitzuan (943 255006 edo hezkuntza@azpeitia.eus). Ikastaroaren inguruko informazioa gehiago nahi duenak ere Hezkuntza zerbitzura jo dezake. 

Heldu eta hezitzaileentzat haur filosofia ezagutu eta lantzen ikasteko hitzordua ere jarri du udalak. Urtarrilaren 14an, larunbata, 11:00etatik 13:00etara izango da horretarako aukera Basazabal Formazio Zentroan. Saio hau ere Jakinmin elkarteak dinamizatuko du eta irakasle, guraso, hezitzaile zein gaian interesa duten heldu orori zuzendurik dago. Informazio gehiago eta izena emateko  Hezkuntza Zerbitzuarekin ( 943 255006 edo hezkuntza@azpeitia.eus) jarri behar da harremanetan.