'Gizontasunak desmuntatzen: indarkeriatik aukera feministetara' tailerra izango da ostiralean

Mugimendu feministaren azken urteetako indar eta gorakadak eztabaida eta korapilo asko ekarri ditu. Indarkeria matxistaren hainbat aurpegi plazaratzearekin batera, indarkeria horren gaineko ardura eta erantzukizunak ere ipini dira erdigunean, eta, horrek, erresistentzia batzuk ekarri ditu.

Gizonek feminismoarekiko duten arduraz asko eztabaidatu izan da, baina zer egin eta nola jokatu ez jakitearen aitzakiapean, aurrerapausoak ez dira nahi bezain handiak izaten sarri.

Gaia lantzeko tailerra antolatu du Emakumeen Txokoak, "eztabaida erreakzionarioak alde batera utzi, botere eta indarkeriaren irakurketa egin eta erabaki feministak hartzeko". Ostiralean izango da, 17:00etatik 20:30era, euskaraz, Emakumeen Txokoan bertan. Eihera kooperatibako Iñigo Etxezarreta Tokak gidatuko du saioa, eta gizonentzat bakarrik izango da. 

Doan izango da, baina parte hartzeko beharrezkoa izango da izena ematea. Horretarako, 688 751 000 zenbakira edo emakumetxokoa@azpeitia.eus helbidera idatzi behar da.