Hainbat proiektu gauzatu ahal izateko kreditu aldaketa egitea onartu du udalak

Apirileko plenoan, 2023ko hainbat proiektu gauzatu ahal izateko bi kreditu aldaketa onartu ziren aho batez. Alde batetik, iaz esleitu baziren ere gauzatu gabe edo erabat gauzatu gabe gelditutako proiektuak bukatzeko kreditua inkorporatu edo txertatzea onartu zen.

Inkorporatutako partida nagusienak, Sistiaga errekako obra (420.000€), jolas lekuen berritzea eta konpontzea (150.000€), Sanjuandegiko skate parkea berrurbanitzatzea (420.000), Aranagoikoako irisgarritasuna hobetzea (270.000€) eta Musika Eskolaren Soreasuko egoitza berriko obrak dira (1 milioi).

Inkorporatutako partidez gain, ordea, partida berriak sortu eta proiektu berriak gauzatzeko diru partida ere jartzea onartu zuten, 1,5 milio euro ingurukoa. Hala, 2023. urteko aurrekontuetan sartzerik izan ez zen hainbat proiektu egiteko dirua jarri du udalak. Horien artean dira, besteak beste, Karmelo Etxegarai Ikastolako jolastokia eraldaketa eta estaltzea (320.000€) eskaladako bigarren fasea gauzatzea (160.000€), kale garbigailua erosteko (25.000€), Oktogonoa eraisteko (125.000€) eta herriko merkataritza txikia sustatzeko Azpeitian Bai proiektua gauzatzeko (292.000€).