Herri hezitzaile filosofian sakontzeko helburuz hiru erronka lehenetsita jarraituko dute lanean eragileek

Azpeitian Herri hezitzaile filosofiaren baitan pausoak ematen jarraitzeko helburuz, erronken berrikuspena egin, egindakoaz hausnartu eta aurrera begirako helburuak zehazteko saioak egin dira urtarriletik martxoaren bukaera bitartean. Saio horietan, 20 eragiletik gora elkartu dira. Eguneraketa eginda, hiru erronka lehenetsi dituzte aurrera begirako ildoen artean: harrera protoko komunitario bat adostu eta osatzea, umeak bakarrik herrian modu autonomoan ibiltzeko baldintzak sortzea eta parte hartze elkarguneen lotura eta elkarlana sustatzea.

Azpeitian, Herri Hezitzaileen filosofiaren baitan, zeuden egitasmoez hausnartu eta berriak abian jartzeko helburuz, 2018an arlo ezberdinetako eragileekin elkarlanean diagnostiko bat egin zen. Prozesu hartan identifikatutako erronkak ardatz hartuta egin dira azken urteotako lanketa eta aurrerapausoak. Lau urte ostean, ordea, herriko ikastetxeek, udalak, hezkuntza ez formaleko eragileek eta herrigintzakoek elkarlanean garatzen duten herri hezitzailearen egitasmoak fase berri bati ekiteko nahia eta beharra sentitu zuten eta diagnosiaren eguneraketa egiten aritu dire 2023aren lehen hiruhilekoan.

Hiru saio egin dira diagnosia errekuperatu eta errepaso orokor bat egin ostean, arloka diagnosia eguneratzeko. Saioetan 20 eragiletik gora elkartu dira eta aurrera begira, hamaika egitasmoren artean, hiru erronka nagusi lehenetsi dituzte parte hartzaileek aurrera begirako lanketari jarraipena emateko: harrera protoko komunitario bat adostu eta osatzea etorri berrientzat, umeak bakarrik herrian modu autonomoan ibiltzeko baldintzak sortzea eta parte hartze elkarguneen lotura eta elkarlana sustatzea.

Leire Goenaga Hezkuntza zinegotziaren arabera, “herri hau denok hezten dugu, etxean, kalean edo lantokian”. Orain egindako eguneraketa honetan, “ikuspegia herrian jarri” dela ere azpimarratu nahi izan du.
Maite Azpiazu Azpeitiko Herri Hezitzaile lantaldeko kideak eta Oinherriko kideak eragileen begiradan jarri du arreta: “Bakoitza eragile baten ordezkari gisa etorri bada ere, interesgarria izan da begirada zabaldu eta herri gisa zehaztea erronkak”.

Oinherriko bazkide laguntzaile
Apirileko ohiko plenoan, Azpeitiko Udalak, aho batez, Oinherriren bazkide laguntzaile izatea onartu zuen. Orain arteko elkarlanerako urtez urteko hitzarmenen bidez egin da, baina hemendik aurrera, Oinherri herri hezitzaile sareko bazkide laguntzaile izango da. Horretarako, 4.000€ko ekarpena egingo du udalak.