Herriko amianto errolda egiten hasi da udala

Dinam enpresaren laguntza izango du errolda egiteko, eta behar bezala identifikatuta ibiliko dira langileak. Aurreikuspenen arabera, sei hilabete inguru beharko dituzte errolda osatzeko.

Azpeitiko amianto errolda egin ahal izateko, herrian barrena ibiliko dira Dinam enpresako langileak, eremu, eraikin eta bestelakoak ikuskatzen. Herrigunea ez ezik, baserriak eta txabolak ere kontuan izango dira erroldan.

Langileak ez dira eremu pribatuetan sartuko, baina begiz eraikin guzti-guztiak errepasatuko dituzte, publikoak nahiz pribatuak. Errolda egiten ari diren langileak arropa islatzaileak jantzita ibiliko dira. Horrez gain, DINAM enpresaren akreditazioa izango dute, eta udalaren ziurtagiri bat ere bai, garbi identifikatu ahal izateko.

Errolda egiteko oinarrizko fase honen ostean, eraikin publiko esanguratsuenen errolda zehatza egingo dute, barrura sartu eta eraikina zehaztasunez ikuskatuz.

Azpeitiko Udala 2024an zen errolda egitekoa, baina IHOBEren metodologia aldaketak tarteko, 2025era atzeratu du.