Herriko merkataritza indartzeko helburuz, hitzarmena sinatu dute udalak eta Bertan merkatari elkarteak

Azpeitiko Udalak 48.200 euroko dirulaguntza emango dio Bertan merkatari elkarteari, herriko txikizkako merkataritza bultzatzeko eta egokitzeko jarduerak gauza ditzan. Nagore Alkorta alkateak eta Marisa Garcia Bertaneko lehendakariak sinatu dute hitzarmena.

Udalaren iritziz, tokiko merkataritzak duen dimentsio ekonomikoa bermatzeko ezinbesteko eragilea da Bertan. Izan ere, hainbat eta hainbat jarduera egiten ditu herriko merkataritza suspertzeko eta sektoreko enplegua bultzatzeko.

Besteak beste, honako hauek dire Bertanen lan ildoak: merkataritza dinamizatzea eta erosketak Azpeitian bertan egitea bultzatzea; merkataritza ehuna sendotuko duten ekintzak aurrera eramatea; herrian kontsumitzen duten erosleen fideltasuna saritzea; dendarien etengabeko prestakuntza bultzatzea; herriko merkatariei aholkularitza zerbitzua eskaintzea; Enkargun zerbitzua eskaintzea; merkatariei beren interesekoa den informazioa eta aholkularitza helaraztea; merkatarien ordezkari lanak egitea udalaren aurrean…