Herriko zein tabernak irabaziko ote du hanburgesa formako garaikurra? Zein harategirena ote haragi onena?

Laugarren aldiz jarraian, hanburgesa eta garagardo dastaketa antolatu dute Azpeitiko Udalak, Ederto-Harakel Gipuzkoako harakinen elkarteak, Bertan Azpeitiko merkatarien elkarteak eta Dendartean Gipuzkoako merkatarien elkarteak.

Larunbatean (maiatzak 24) izango da, eta berrikuntza batekin dator aurtengo ekitaldia; izan ere, lehiaketa baten ordez, bi izango dira: harategiei zuzendutako Gipuzkoako hanburgesa-haragi lehiaketa eta Azpeitiko taberna eta jatetxeei zuzendutako lehiaketa.

Hanburgesa lehiaketak hartu duen indarra txalotu du Mikel Odriozola Azpeitiko Udaleko Festa batzordeburuak. “Saltsa polita sortzen du plazan, plan ederra baita hanburgesa bat janez jendearekin egotea. Aurten, gainera, herriko tabernen arteko lehiaketarekin, seguru gaude ikusmina oraindik eta handiagoa izango dela”. Halako ekitaldiek tokiko ekonomia sustatzeko duten garrantzia ere azpimarratu du.

Gipuzkoako harategien arteko lehiaketa

Bihar itxiko da izena emateko epea, baina hogeiren bat harategik parte hartzea aurreikusten da. Larunbatean, haragia bera bakarrik dastatuko du epaimahaiak. Azoka Plazara joaten direnek, berriz, lehiaketara aurkeztu direnen hanburgesak jateko aukera izango dute, ogi artean eta norberaren gustuko gehigarriekin: gazta, tipula potxatua, ketchupa, mahonesa. 5 euro balioko du hanburgesak, eta laguntzeko, artisau garagardoak egongo dira.

Tabernen arteko lehia

Aurtengo berrikuntza nagusia Azpeitiko taberna eta jatetxeei zuzendutako lehiaketa da. Hamarrek eman dute izena: Ertz, Mendizaliek, Aisialdi, DA, Mendizabal, Main, Osinazpi, Sanagustin, Etxe-Zuri, Pastorkua. Izena eman duten taberna eta jatetxeetan tuper bana utzi dute antolatzaileek, eta aste honetan, aurrez esandako egunean, bila pasatuko dira.

Hanburgesa bat prestatu beharko du taberna bakoitzak, formatu klasikoan: ogia, haragia eta osagarriak izan beharko ditu. Herriko elkarte gastronomiko batean elkartuko da epaimahaia, eta irabazlea aukeratuko du. Larunbatean jakinaraziko dute zein den garailea.

Azpeitiko hanburgesa onenaren txapelketaren irabazleak, Azpeitiko hanburgesa onenaren izendapena ez ezik, hanburgesa formako oroigarri bat jasoko du. Aurkeztutako hanburgesa gutxienez lau astez kartan eskaini beharko dute txapelketan parte hartzen duten tabernek eta jatetxeek, hau da, ekainaren 22ra arte. Hanburgesa horrek, gehienez, hogei euroko prezioa izango du.

Tokiko ostalaritzaren lana aitortzea eta horietan egiten dituzten hanburgesen kalitatea eta originaltasuna saritzea dira lehiaketaren helburuak.