Herritarrek udal kudeaketaz eta beste hainbat gairi buruz duten iritzia jaso nahi du udalak

Azpeitiko Udalak herritarren kezkak, zalantzak eta beharrak zein diren jakin nahi du, etorkizuneko erabakietan kontuan hartzeko. Horretarako, Aztiker enpresaren bidez, inkestak egingo ditu herritarren artean, telefono bidez. Lagina adierazgarria izan dadin, 400 herritar ingururi deituko zaie.

Besteak beste, udalaren kudeaketaz, gai zehatz batzuez, ordezkari politikoez eta hurrengo urteetara begirako proiektuez duten iritzia galdetuko zaie herritarrei.

Dagoeneko hasi dira deiak egiten, eta bizpahiru aste beharko dituzte dei guztiak egiteko. “Deia jasoz gero, asko eskertuko genuke erantzuteko tartetxo bat hartzea; ez dira inkesta luzeak izango, eta jasotako informazioa oso baliagarria izango zaigu”, esan dute udal ordezkariek.