'Herriye' herri antzerkiarekin eta txontxongiloen erakusketa irekierarekin hasiko dira Euskal Antzerki Topaketak

Azaroaren 1etik 20ra bitartean izango da Euskal Antzerki Topaketen 40. edizioa. Urteurren borobil horretarako egitarau oparoa eta beste hainbat berrikuntza prestatu ditu Azpeitiko Udalak, Kulturaz kooperatiba bidelagun duela. Indarberrituta eta garaira egokitzeko apustu sendoa egin da aurtengoan. Azken urteotako itxura aldaketari, sarerako saltoa gaineratu behar zaio aurtengoan. Hala, www.antzerkitopaketak.eus helbidean euskarazko wikipedian eta sare sozialetarako saltoa eman du ekimenak. 

Azaroa hastearekin bat, hasiko da euskarazko antzerkiaren plaza den Euskal Antzerki Topaketen 40. edizioa. Indartsu hasiko da gainera. Azaroaren 1ean, bi hitzordu jarriak ditu. Alde batetik, eguerdian, azpeitiarren artean horren maitatua den Corrado Masacciren txontxongiloen erakusketa irekiko da Betharram-etako udal erakusketa aretoan. Ondoren, arratsaldean estreinatu eta taularatuko da Herriyen obra; azpeitiarrek Azpeitiaz egindako antzezlana. Herri antzerkiak ikusmina sortu du herrian izan ere sarrerak salgai jarri eta egun guxtian bukatu ziren azaraoaren 1etik 4ra eskainiko diren lau emanaldietarako sarrerak. Beraz, sanagustin antzerkizalez beteta dela emango zaio hasiera aurtengo edizioari. 

Guztira, haur eta helduentzako 11 antzezlan izango dira ikusgai; tartean, Herriye herri antzerkia, Zeozertan dabil, baina ez dakit zertan eta Intxaurra lanak estreinatuko dira. Ostegunetik igandera bitarteko emanaldiez gain, azaroaren 14tik 16ra bitartean, eskola antzerkiaren baitan 7 emanaldi izango dira herriko txikienen artean antzerkizaletasuna sustatzeko helburuz. Eta, aurrez aipatu bezala, Corrado Masacciren txontxongilo erakusketak ere ez du hutsik egingo eta azaroaren 1etik 15era bitartean izango da ikusgai Betharrametako udal erakusketa aretoan; astelehenetik ostiralera 18:00etatik 20:00etara eta asteburu eta jai egunetan 12:00etatik 14:00etara. Horretaz gain, urtero bezala, haurren bisitak jasoko ditu ikastetxeetatik. 

Izaera indartzen

Heldutasunera iritsira, azken urteotan pixkanaka eman den aldaketaren baitan jauzia ere eman dute topaketek. Aurtengoan, sareratzeari eman zaio garrantzia eta horretan jarri dira indarra eta baliabideak. Hala, www.topaketak.eus webgunea abian dago. Bertan, topaketen inguruko informazioa, egitaraua eta sarrerak erosteko gunea aurki daitezke. Sare sozialetarako saltoa ere emango da gaurtik aurrera. Sarrerak bertatik erosteaz gain, aurrez aurre Sanagustin kulturgunean erosteko aukera ere izango da. Helduentzako sarrera 10€koa izango da eta haurrena 5€koa. Eta aurtengoan, emanaldi guztietarako balioko duen bonoa ere jarri da martxan. Bonoa dutenek, emanaldiaren aurretik sarrera eskuratu beharko dute.

Baina sareetarako saltoaz gain, euskarazko Wikipediako orria ere osatu da Wiki elkartearekin batera, dokumentazio lan handia egin ostean. 

Egitarauaren baitan, antzerki emanaldiez gain, beste hainbat ekimen ere prestatu dituzte. Alde batetik, bi horma-irudi egingo dira. Lehenengoa, dagoeneko ikusgai dago Soreasurako tunelean. Eta Bigarrena, Soreasu auzoan egingo dutela aurreratu dute. Bigarren horma-irudi horren aurkezpena, azaroaren 12an egingo den Topa ekimenaren baitan egingo dute. Egun hori orain arteko lana eskertzeko eta elkarrekin topa egiteko baliatu nahi dute antolatzaileek.

Eta, 40 urteen memoria ariketa irudiz laguntzeko Azpeitiko Argazki Elkarteak berain artxiboko irudiekin topaketen baitako argazki erakusketa jarriko dute Sanagustinen hiru astez.