Hilaren amaierara arte eska ditzakete hobariak familia ugariek

2024/03/08

Familia ugariek martxoaren 31ra arteko epea dute Ondasun Higiezinen Zergaren (OHZ) eta Trakzio Mekanikodun Ibilgailuen Zergaren (TMIZ) hobariak eskatzeko. Udaletxeko Herritarren Arreta Zerbitzuen bulegoan egin behar da eskaera.

Urtez urte eskatu behar izaten dira hobariak, eta familia ugariek aurten ere izango dute horretarako aukera. Udaletxeko Herritarren Arreta Zerbitzuen bulegoan egin beharko dute eskaera, eta familia ugariaren titulua eta familia unitateko kideen errenta aitorpeneko agiriak aurkeztu beharko dituzte; udalari dokumentu horiei buruzko kontsulta egiteko baimena emanez gero, ez dago dokumentuak ekarri beharrik. Hobariak eskuratzeko, beharrezkoa da familiako kide guztiak etxe berean erroldatuta egotea.

Ondasun Higiezinen Zergaren hobaria familiaren Pertsona Fisikoen Errentaren Zergaren (PFEZ) araberakoa izango da. Honako hauek dira baremoak:

Seme-alaba kopurua	0-24.000€	24.000€-50.000€	50.000€-90.000€	90.000€tik gora
3	%90	%50	%15	0
4	%90	%70	%40	0
5 edo gehiago	%90	%90	%60	0

Trakzio Mekanikodun Ibilgailuen Zergaren hobaria ere PFEZaren arabera aplikatuko da. Dena den, honako baldintza hauek bete beharko dira hobaria jasotzeko: familia unitate bakoitzak bost plaza edo gehiagoko turismo batentzat izango du hobaria; eta ibilgailuak, gehienez, 13,99 zaldi fiskal izango ditu. Honako hau da hobarien baremoa:

Diru-sarrera gordina	0€-24.000€	24.000€-50.000€	50.000€-90.000€	90.000€tIk gora
Hobaria	%40	%30	%2	0