Hobetze lanek eragina izango dute Soreasuko aparkalekuaren erabileran

Astelehenetik ostiralera bitartean (maiatzaren 27tik 31ra), Soreasuko lur azpiko aparkalekurako sarbidea hobetzeko lanak egingo ditu Azpeitiko Udalak. Ondorioz, 09:00etatik 17:00etara bitartean, ibilgailuek debekatuta izango dituzte aparkalekurako sartu-irtenak.

Harrizko zoladura dago gaur egun aparkalekuaren sarreran, eta asfaltatu egingo dute gunea. Horrez gain, lurreko seinaletika hobetuko dute, eta aparkalekuko malda leundu. Era berean, unean-unean zenbat plaza dauden libre adierazten duen pantaila jarriko dute.

Datorren asteko lanek erabiltzaile guztiei eragingo diete, hau da, baita aparkalekuko ohiko erabiltzaileei ere. Hala ere, gauez aparkatzeko ez da arazorik izango, eta autoa barruan aparkatuta uzteko ere ez, sarbidean bakarrik egingo dituztelako lanak.