Uneotan esku artean dituen datuen arabera, 04:00ak inguruan, Ertzaintzak pertsona bat identifikatu du Urola kalean, pintaketa baten harira, eta Udaltzaingoari ere eskatu dio tokira bertaratzeko.
Esku-hartze hori amaitu ostean, beren zereginetara itzuli dira udaltzainak. Orduan, pertsona batzuk Udaltzaingora sartu dira, aurrez izandako identifikazioari buruzko beren kexa adieraztera, eta kanpoan ere jende asko hasi da pilatzen.
Babesgabe sentitu dira lanean zeuden udaltzainak, eta Ertzaintzari deitu diote. Berehala, patruila ugari bertaratu dira. Tentsio uneak izan diren arren, lortu da giroa baretzea.
Udalak babesa adierazi nahi die atzo gauean lanean zeuden udaltzainei. Horrez gain, ertzainen hedapena neurriz kanpokoa izan zela adierazi nahi du. Atzo goizetik, ertzainen ezohiko presentzia zegoen herrian, eta horren arrazoiak argitzeko lanetan ere ari da udala.
Festa giroan sortzen diren tentsio egoerak baretzeko arduraz eta erantzukizunez jokatzearen garrantzia azpimarratu du erakundeak, eta tentsioa areagotzeko jarrerak ez direla onargarriak azpimarratu. Santio eta saninazio jaiak gainean diren honetan, elkarrekin errespetuz jokatzera dei egin die udalak guztiei.