Izarraizko atea parkeko ur-txorroak zabalik dira

Uda iristearekin batera ireki dira Izarraizko Atea parkeko ur-txorroak. Aste bukaerarako eguzki eta tenperatura altuen iragarpena ikusirik erabaki du Udalak txorroak irekitzea. Azken asteotan prest izateko mantenu lanak egin ostean ireki dira; iraila-urrira arte (eguraldiaren arabera) izango dira irekita.

2017ko uztailetik da irekita parkea, eta hasieratik harrera ona izan du parkeak. Herritar zein bisitari ugari ibiltzen da bertan, eta, uda garaian, ur-txorroak izan dira azken bi udetan haur zein gaztetxoentzat erakargarri.

Udalak parkean giza-legez jokatzeko eskatu nahi du bukatzeko; hondakinak ondo sailkatuta edukiontzietara botatzeko eskatu nahi du, zakurrak lotuta ibiltzeko eta jolasean, hizketan edo dena delakoan errespetuz ibiltzeko. Horretaz gain, gogoratu nahi du ur-putzuan ezin dela animaliarik sartu.