Izeta IV. eta Goikoetxea aurrez aurre izango dira larunbatean, zezen plazan

Hasijasotze apustua izango da larunbatean, maiatzak 4, 19:00etatik aurrera zenzen plazan. Izeta IV.a eta Goikoetxea izango dira norgehiagoka 125 Kiloko harri kubikoa nork gehiago jaso. Sarrerak, egunean bertan 18:00etatik aurrera eros ahal izango dira takilan. 

Azpeitiko zezen plaza herri kirolen plaza bilakatuko da beste behin ere larunbatean. Oraingoan harria izango da protagonista. Erresistentzia eta indar erakustaldia eskaintzea dute helburu bi harri-jasotzaileek eta Azpeitia aukeratu dute horretarako. "Herri kirolean zailtasun asko izaten dira, eta guk kirolariak lagundu eta herri kirolak babestuz, herri kiroletan ere duintasunez aritzeko apustua egiten dugu. Horregatik eskertu nahi dizuegu Azpeitia aukeratzea", adierazi du Estitxu Elduaien Kirol Batzordeburuak. 

Ez da aukera askorik izaten harri jasotzaileen arteko apustuak ikusteko: "Ohikoagoa da plazako erakusketa edo bestelakoak ikustea, bi harri jasotzaileen arteko oreka bilatzea ere ez delako erraza", adierazi du Juan Mari Iraola Zarautz Herri Kirol elkarteko ordezkariak. Hala ere, larunbateko ikuskizuna oso orekatua izango dela iritzi diote bi entrenatzaileek. 

Ordu eta erdi inguruko ikuskizuna izango da, eta bi kirolariek 10 minutuko hiru tanda egingo dituzte txandaka. Tandatik tandara, bost minutuko atsedenaldia ere izango da. Altxaldi gehiena egiten dituenak irabaziko du, eta irabazleak 12.000 euro jasoko ditu (bakoitzak jarritako 6.000 euroak).