Kalean egon den giroa, saninaziotako protagonista
2024/08/05
Bukatu berri dira aurtengo saninazioak, eta festetako egun guztietan kalean “sekulako giroa” egon dela nabarmendu du Azpeitiko Udalak haien balorazioa egiteko orduan. Festak aurrera ateratzea posible egin duten guztiei eskerrak eman dizkie udalak.
Besteak beste, herritarren erabakiz txupinazoa azokara etortzen diren baserritarrek bota izana eta euskal taldeen kontzertuak izan dira aurtengo saninazioen bereizgarrietako batzuk.
Mikel Odriozola Festa batzordeburuaren esanetan, txupinazoaren unea izan zen festetako momenturik hunkigarrienetakoa. “Herritarrek aitortza bat egin nahi izan diete astero-astero azokara etortzen diren baserritarrei. Horietako asko udaletxean izan ziren Saninazio bezperan, eta giro berezia bezain polita sortu zen”.
Euskal taldeen aldeko apustua egin du udalak aurtengo saninazioetan, eta plaza betetzea lortu dute bai ETSk, bai Izarok, bai Zetakek. “Jendetza izan da kontzertuetan; adin guztietako jendea, gainera. Ondo pasatzeko gogoa igartzen zen, eta leporaino beteta, itxura ikusgarria izan du plazak kontzertuetan”. Iaz bezala, aniztasun funtzionaleko gunea egokitu du udalak kioskoan. “Aurrera begira ere, horrelako pauso gehiago ematea nahiko genuke, denek izan dezaten festez gozatzeko aukera”.
Alabaina, talde handi horiek ez ezik, bestelako jarduerek ere jende asko erakarri dutela azpimarratu du Odriozolak. “Gauez ez ezik, goiz eta arratsaldetan ere jende ugari ibili da programako bestelako ekitaldietan nahiz kaleetan”.
Esker oneko hitzak
Hain zuzen, uztailaren 20tik abuztuaren 2ra bitartean, ekitaldi ugari izan da herrian. “Uste dut adin eta interes guztiak asetzeko moduko eskaintza egon dela, eta beste behin esan nahiko nuke hori herriko eragileek egiten duten lanari esker dela. Elkarlanean antolatzen dira saninazioak, eta esker oneko hitzak besterik ez ditut halako borondatea jartzen duten hainbeste eta hainbeste eragilerentzat”.
Era berean, festa egunetan lan egiten duten guztien esfortzua eskertu du zinegotziak: “Brigadako langileek, kale garbitzaileek, eraikin garbitzaileek, udaltzainek, udal teknikariek eta abar ikusten ez den lan handia egiten dute herritarrek festez gozatu ahal izateko.
Eraso salaketarik ez
Udalak kanpaina berezi bat ere egin du aurtengo saninazioetan, ‘Danok eo iñorrez. Danona da festie, danona da ardurie’ lelopean. Gizonkeriari, LGTBI+ kolektiboari, zaintza eta etxeko lanei eta tratu onei erreferentzia egin dien kanpaina izan da. Horrez gain, ohi bezala, puntu morea ere egon da saninazioetan.“Alde horretatik ere gustura gaude, ez dugulako inolako erasoren berri izan”, adierazi du Odriozolak.
Aurrera begira ere kanpaina horretan sakontzeko asmoa du udalak.