Kirgizistanen eskalada bide berriak irekitzeko proiektua lagunduko du Joxe Takolo bekak

Azpeitiko Udalak eta Gipuzkoako Mendizale Federazioak ematen duten Joxe Takolo bekak eskalada proiektu bat sarituko du aurten: Mikel Txintxurreta eta Imanol Muro donostiarrek aurkeztutako Donostiatik Kirgistanera izenekoa. Djangart mendilerroan, “mendi birjinetan bide berriak irekitzea” da bi mendizaleen helburua.

Ion Oteiza Azpeitiko Udaleko Kirol batzordeburuak azaldu duenez, proiektuaren “originaltasuna” baloratu du batik bat epaimahaiak. “Eskalada bide berriak ireki nahi dituzte, historikoki oso-oso espedizio gutxi jaso dituen Kirgizistango mendilerro batean”.

Umetatik ezagutzen dute elkar Txintxurretak eta Murok, eta sokalagunak dira azken urteetan. Gazteak izan arren, eskaladako teknika ezberdinetan esperientzia handia dute, eta gertuko nahiz urruneko mendietan ibilitakoak dira. “Guretzat pozgarria da Joxe Takolo bekaren bidez gazteei erronka berriak gauzatzeko aukera eman ahal izatea”, adierazi du Oteizak.

Hainbat zailtasun dituen proiektua

Ekonomikoki “asko exijituko” dien proiektua izango dela esan dute Txintxurretak eta Murok, eta bekaren laguntzarik gabe akaso ez zirela joango. Irisgarritasuna da Djangart mendilerroaren zailtasunetako bat. Kirgizistango Hego-Mendebaldean dago, Txinarekin mugan, eta 4.500-5.000 metro inguruko mendiak ditu. “Kamioi sobietar zaharretan joan beharko dugu, errekak gurutzatzeko gaitasuna duten kamioi gogorretan”.

Bi mendizaleek duten informazioaren arabera, gaur egunera arte zortzi edo bederatzi espedizio jaso ditu Djangart mendilerroak. “Lehen euskaldunak izan nahi dugu”. Hain mendilerro ezezaguna izatearen oztopo bat da informazio oso gutxi dagoela. “Ez dago mapa onik. Google Earth eta antzeko aplikazioekin aritu gara begira, baina informazio hori ere ez omen da oso fidagarria. Bertara iritsi arte ez dugu ondo jakingo benetan zer horma dauden. Horregatik, iritsitakoan zerbait interesgarriagoa ikusten badugu, horri helduko diogu”.

Djangartek mendi birjinak eskalatzeko eta eskalada bide berriak irekitzeko eskaintzen duen aukera zabalak erakarri ditu gehienbat. Uztailaren amaieratik abuztuaren amaierara arte joango dira, eta hiru bailara dituzte begiz jota. Helburu nagusitazat Pik Letaveta tontorra ipar-ekialdeko aurpegitik eskalatzea jarri dute, oraindik inork ez baitu eskalatu aurpegi horretatik.

Eguraldi ezegonkorra izan ohi da Djangarten, eta horrek, akaso, planak aldaraziko dizkiela azaldu dute. “Hala ere, gure helburua beti bide berriak irekitzea izango da”. Gehitu dute “ahalik eta kanpo laguntzarik txikienarekin” ibiltzen saiatuko direla, mendiari ere ahalik eta arrasto txikiena uzteko.