Konpontzera eraman dute sokamuturrari eskainitako brontzezko eskultura

Urrian, ezkerreko besoa eta soka puska bat apurtuta zituela agertu zen Done Jakue kalean dagoen sokamutilaren brontzezko eskultura. Azaroan, berriz, haizeak Gernikako arbola bota zuen, eta eskulturaren gainera erori zen. Ondorioz, zezenaren irudiari hainbat kalte eragin zizkion.

Atzo eraman zuten eskultura osoa konpontzera. Hasiera batean, Done Jakue kalean bertan konpontzea zen udalaren asmoa. Zezenak dituen deformazioak bere onera ekartzeko, ordea, ezinbestekoa izan da kentzea.

2002an jarri zuten Done Jakue kalean sokamuturraren omenezko eskultura. Handik kentzen duten lehen aldia da; aurrez ere egin izan dizkiote kalteak, baina tokian bertan konpondu izan dute.