Kultura digitala sustatzeko autobusa izango da aprilaren 5etik 10era, Perez Arregi plazan

'Kultura Digital@: erabilera ona eta sorkuntza” goiburuarekin, ekintza eta jardueren eskaintza zabala antolatu da datozen egunetarako Azpeitian.
Perez Arregi Plazan Gipuzkoako Foru Aldundiak Azpeitiko Udalaren laguntzarekin kultura digitalaren inguruan informatu, hausnartu eta teknologiaren erabilera ona bultzatzeko helburuarekin autobus bat jarri du.Haurren eta gazteen gaitasun digitalak garatuz, haien gizarteratzean aurrera egitea eta garapen kulturala eta soziala ahalbidetzea bilatu nahi da ekimen horrekin.

Leire Goenaga Hezkuntza zinegotziak eskerrak eman dizkio Mari Jose Telleria Foru ALdundiko Kultura zuzendariari ekimen hau Azpeitira ekartzeagatik: "Gaur egungo haur eta gaztetxoakmundu digitalean jaio, hezi eta bizi dira. Oso azkar doan mundua da, eta tresna digitalei erabilera emateko ezinbestekoa da ezagutza. Udaletik haur zein gurasoei zuzenduriko teknologia berri eta ziberbullyng-aren inguruko ikastaroak antolatu izan ditugu eta horrelako ekimenak ere ppositiboak dira bide horretan".

Telleriak adierazi duenez, Aldunditik lan egiten da gazteak hezteko eta sareak eta Internetek dituzten arriskuetaz kontziente izateko. “Teknologia berriak gure bizitzeko, lan egiteko eta harremanak izateko modua aldatzen ari dira, eta egoera honen aurrean, umeek, nerabeek eta gazteek ez dute esperientziarik edota kanpoko erreferentziarik planteatzen zaizkien egoera eta erronkei aurre egiteko”, esan du.

Erronkei begira Goenagak teknologiak eskaintzen dituen aukerak azpimarratu nahi izan ditu: "Autobus honek ere programaziori zuzenduriko atal bat izango du. Formazioari lotutako aukerak ere bilatuko dituzte gaztetxoek". Teknologia eskura izanagatik zenbaitetan urruti sentitzen dela ere gaineratu du: "Teknologiak eskaintzen dituen aukerak eskura dituzte gaztetxoek, baina askotan beldurra ere ematen du eta urruti sentitzen dute. Programazioa edo horrelako ikasgaietan, adibidez, emakumeen presentzia oso txikia da, eta zatiketa horrekin bukatu, eta emakumeak ikasgai teknologikoetan integratzeko aukerak ere eskaini behar ditugu".

Ekintza ugari, 5 egunean
Hainbat ekintza antolatu dira apirilaren 5etik 10era bitartean egiteko. Alde batetik, ikasgela ibiltarian (iaz ere herriz herri ibili zen autobusa, Irizarrek utzita) bideo-jokoak eta webguneak sortzeko programazio-tailerrak eskainiko zaizkie ume eta gaztetxoei (8-16 urte).

Bestalde, ikastetxeekin elkarlanean, ikasleen proiektu teknologikoen aurkezpenak ere egingo dira. Topaketak ere antolatu dira herri bakoitzean ezagupen digitala eta teknologikoa lantzen duten elkarteekin.

Topaketa eta bilkura horietan parte hartzen duten haur, nerabe, gazte, guraso eta hezitzaileen artean zibersegurtasuna lantzeko prestatu duen material didaktikoa zabalduko da.

Egunaren bukaeran, 20:00etan, 8Gb-ko eta konektore bikoitzak dituzten hiru pendrive zozketatuko dira egun horretan parte hartu duten pertsonen artean.