Lardaxka zerbitzuan landu daitezkeen hainbat gai, bideo laburretan

Lardaxka Sexualitate, Genero eta Bikote Aholkularitza Zerbitzua herriratu eta zabaldu asmoz, sei bideo labur egin ditu Azpeitiko Udaleko Parekidetasun Sailak, aholkularitzan ohikoak diren gaiak ardatz hartuta. Hiru Damatxo Ideia Faktoria izan dute bidelagun, eta Erika Olaizola eta Xanti Agirrezabala aritu dira aktore lanetan.

Duela urte batzuetatik eskaintzen du Azpeitiko Udalak sexualitate, genero eta bikote aholkularitza (lehen Plax! izenpean, eta 2023. urtetik Lardaxka izenarekin). Sexuaren, generoaren eta harremanen inguruko ezinegonak, zalantzak eta zailtasunak argitzeko zerbitzua da. Ikuspegi zientifiko-sexologikoan oinarritutako informazioa eskaintzen du, gaur egun, oraindik, gure artean zabaltzen diren topiko, beldur eta aurreiritziei aurre egiten laguntzeko.

Zerbitzua herritar orori irekita dago, eta bi astean behin eskaintzen da, asteartetan, goizez zein arratsaldez, doan. Hitzordu bat hartu nahi duenak 688 751 000 whatsapp zenbakira mezua idatzi behar du edo 943 15 70 55 telefonora deitu.

Zerbitzua gehiago ezagutarazi eta sexualitatearen inguruko tabuak hausten lagundu asmoz, datozen sei asteetan bideo laburrak zabalduko ditu udalak, aholkularitzan ohikoak diren gaiak modu umoretsu eta hezitzailean landuz.