Larunbat eguerdia, ardo eta txorizo artean

Ardoa eta txorizoa izango dira protagonista, larunbatean, Azpeitiko plazan: 17. aldiz egingo da Ardo Dastaketa Eguna, eta hamahiru upategik parte hartuko dute. Horrekin batera, 10. Euskal Herriko Txorizo Egosi Lehiaketa ere izango da, eta hemeretzi harategi ariko dira lehian.

Ardo Dastaketa Eguna “egun seinalatua” bihurtu dela herritarrentzat esan du Mikel Odriozola udaleko Festa batzordeburuak. “Gazte zein helduentzat elkartzeko aitzakia ederra izaten da Ardo Dastaketa Eguna, eta giro oso polita sortzen da plazan”. Era berean, Euskal Herriko Txorizo Egosi lehiaketak ere baduela indarra esan du. “Garrantzitsua izaten da harategientzat, beren produktuak erakusteko erakusleiho bat delako lehiaketa”. 11:30ean hasiko da dastaketa, eta 14:30 aldera arte egongo dira irekita postuak.

Azpeitiko Udalak antolatzen du eguna, Dendartean, Odriozola Ardoak, Ederto Harakel eta Gipuzkoako Merkataritza Federazioaren laguntzarekin. Misio taldeko eta Gaixo eta Elbarrien Aisialdi taldeko boluntarioak aritzen dira txorizoa egosten eta banatzen, eta txorizoekin jasotako dirua haientzat izaten da, garapen bidean diren herrialdeetako proiektuetara bideratzeko.

Txori egosi pintxoak ez ezik, herriko gaztagileek ere jartzen dituzte postuak plazan. Txorizo egosi eta gazta pintxoak bi euroan salduko dira, kopa euro batean eta ardo dastaketarako txartelak binaka, parea hiru euroan eta lau ardo bost euroan. Eguna girotzeko, mahatsez betetako aska bat ere jarriko dute, eta dantza suelto eskolako bikote batek zapalduko du mahatsa.

13 upategitako ardoa dastagai

Larunbatean, lau sor markatako ardoak izango dira plaza:

• Arabar Errioxako sor marka: Tobelos, Eguren Ugarte, Viña Real eta Ostatu.
• Errioxa sor marka: Zinio, Dominio de Berzal, Valcuerna, Lan, Salceda, Olarra eta Pierola.
• Besteak: Juve & Camps (Penedes) eta Inurrieta (Nafarroa).

Hemeretzi harategi txorizo lehian

Euskal Herriko Txorizo Egosi Lehiaketari dagokionez, Gipuzkoako, Bizkaiko eta Nafarroako hemerezi harategi hauek parte hartuko dute: Valentin Odriozola (Azpeitia), Agirre-Etxe (Arrasate), Jose Maria Otegui (Eibar), Joxe Mari Barriola (Ibarra), Arrizabalaga Senideak (Mutriku), Kepa Loidi (Orio), Benito Deba (Ormaiztegi), Pako (Olazti), Arozena (Tolosa), Miren (Tolosa), I. Barriola (Tolosa), Oiarbide (Zegama), Otamendi (Arrasate), Arteaga (Donostia), Okela (Donostia), Muñagorri (Tolosa), Gesalaga (Zarautz), Bengoetxea (Donostia), Biyona (Zarautz).

Egun osoko egitaraua

Eguna biribiltzeko, arratsaldean, Bustintzuriko Errebaleko jaiei lotuta, sokamuturra izango da kale horretan 16:30etik aurrera. Ohiko lekuan ibiltzeaz gain, Artetxe aurrean ere ibiliko da zezena.

42. Euskal Antzerki Topaketen barruan, 19:00etan, Atx taldeak Marmarra emanaldia eskainiko du Frontoi Txiki ondoko plazatxoan.