Lau hautagairen artean bat aukeratzeko unea

Saninazio bezperan, eguerdian, balkoira begiratu eta txupinazoa botatzen zein ikusi nahiko luketen galdetuta, argi geratu da, herritarren ustez, horretarako merezimenduak dituzten pertsona eta talde asko daudela Azpeitian. Lehen aldiz eman du udalak hautagaiak proposatzeko aukera, eta hogeitik gora izen jaso ditu.

Herriari egindako ekarpena, berdintasuna eta bizikidetza sustatzeko egindako ahalegina, euskal kulturaren alde egindako lana eta beste irizpide batzuk kontuan hartuta, horien guztien artean lau aukeratu ditu Festa Batzordeak. Orain, lau horietatik bat hautatu beharko dute herritarrek, bozketa bidez. Puntuazio bidezko sistema izango da; hau da, gehien gustatzen zaigun hautagaiari lau boto eman behar zaizkio, eta gainerakoei hiru, bi edo bat, norbere lehentasunen hurrenkeran.

Bi bide egongo dira botoa emateko. Alde batetik, Internet bidez, www.azpeitia.eus helbidean; eta, bestetik, udaletxean, igerilekuan eta liburutegian egongo diren postontzien bidez. Herritar bakoitzak behin bakarrik eman ahal izango du botoa; horregatik, nortasun agiria eskatuko da; herrian erroldatuta ez daudenek ezin dute bozketan parte hartu.

Eta zein dira bada lau hautagaiak eta herritarrek zergatik proposatu dituzte?

• Uztarria / Azpeitiko Guka. Herriko informazio zehatza eta gaurkotua eskaintzeko egiten duen lanagatik, euskararen biziberritzeari egiten dion ekarpenagatik, lortu duen erreferentzialtasunagatik...
• Azoka Plazako ekoizleak. Asteartero-asteartero, eta azken urteotan ostiraletan ere bai, azoka plaza indartzeko egiten ari diren lanagatik, bertako produktuak eskaintzeko eta lurra zaintzeko egiten duten lanagatik...
• Sierbetako mojak. Hainbeste urtean herritarren zaintzan lan egin ostean, eta Azpeititik badoazela kontuan hartuta, haien lana eskertzeagatik. Sierbetako mojak orokorrean ez ezik, Sor Lourdes eta sor Trinidad azpeitiarrak bakarrik ere proposatu dituzten herritarrek.
• Elkar-ekin. Palestinarrekin egiten ari diren sarraskia salatzeko antolatu dituen ekintzengatik, orokorrean egiten duen lanagatik...

Gaurtik ekainaren 28ra arte egongo da botoa emateko aukera. Animatu parte hartzera!