Madalena ingurua eraberrituz, bertako landare espezieen inguruko sentsibilizaziorako gunea sortuko du udalak

Madalena auzoa eraberritzen jarraitzen du udalak. Hala, Azken hilabeteotan baselizaren inguruko hainbat etxebizitza bloke eskuratu, eraitsi eta ingurua eraberritu ditu udalak. Orain, ermitaren atzealdeko maldako lur publikoa berreskuratzeko proiektua sustatu du eta 48.023,20€-koaurrekontua onartu du Gipuzkoako Foru Aldundiak horretarako. Hau da, Azpeitiko Udalak proiektua aurkeztu du, eta behin proiektua eta aurrekontua onartuta dituenez, aldundiari dagokio lanak exekutatzea.

Proiektua bi asmo elkartuz egingo da; alde batetik, udalak eremu hori berreskuratzeko asmoa zuen, eta bestetik Urola Bizirik natur taldeak bertako landare espezieak landatu eta sentsibilizaziorako gune bat sortzeko asmoa azaldu zion udalari. Hala, biak uztartuz egin da aurkeztu den proiektua.

Baso egiturak sustatzeko paisaia proiektu holistiko bat garatzean datza asmoak. Helburu nagusia udal jabetzakoak diren landa lurrak berroneratu, bertako baso landareak ugaltzeko eremu bat egituratu eta gizartearen sentsibilizazioa sustatuko duen leku gisa antolatzea da.

Horretarako, lurren lehengoratzea azkartzeko bertako zuhaixken landaketak burutuko dira; Izarraitz KBE-ko amortiguazio eremuan bertako flora egitura berroneratuko da; auzo baratzeen kultur paisaia berreskuratzeko lanak burutuko dira; Hariztiaren segida indartzeko landaketak eta hauen hedapena sustatuko da; azalera iragazkarri eta ahalik eta bigunena sortuko da; bertako zuhaixken museo bizi eta bisitagarria egingo da; klima-aldaketarekiko eta balio naturalen babesarekiko gizarte-kontzientzia indartzea ahalbidetuko da eta baso natural eremuak birsortzeko landare mintegia indartuko da.