Maila guztietan euskara doan ikas daiteke aurten ere Udal Euskaltegian

Euskara ikasi edo hobetu nahi duen ororentzako eskaintza prest du Udal Euskaltegiak. Ikasturte berriko eskaintzan izena emateko epea irekita izango da irailaren 24ra arte. Azpeitian euskaraz doan ikas daiteke, beka sistemaren bidez.

Euskaraz jakin arren, hobetu edo tituluren bat atera nahi dutenentzat, euskaraz ikasten hasiak direnentzat, lehen urratsak eman nahi dituztenentzat.... herritar guztientzako moduko eta denetariko ikastaroak antolatuko dira aurtengorako. A1, A2, B1, B2, C1 eta C2 mailetako tituluak ateratzeko aukera eskaintzen da. Saioak, goiz, arrats zein gauez dira, eta eskaintza zabala egiten da euskaraz ikasteko.

Azken urteotako esperientzia ona ikusirik, hainbat mailatan online eskaintza ere egingo da; hau da, euskara ikasi nahi dutenei erraztasunak eman nahi zaizkie horretarako. Horrela, Udal Euskaltegiak herritarrei eskaintzen zaien zerbitzua zabaldu eta hobetzea da helburua. Norberak ondoen doakion maila eta modalitatean ikasteko.

Eneritz Albizu Euskara batzordeburuak nabarmendu du euskara ikasi nahi duen “edonork” horretarako aukera duela; horregatik, “maila guztietan” da doakoa euskaraz ikastea, Azpeitian erroldatuta egon eta gutxiengo asistentzia betez gero. Ordutegiei dagokienez ere, “herritarren beharretara egokitutako” ordutegiak jartzen saiatzen da euskaltegia. Euskara Azpeitian integratzeko "ezinbesteko tresna" dela ere azpimarratu nahi izan du: "Gurea arnasgune bat da, euskaraz bizi gaitezke hemen. Hori, hein batean, posible da herritar askok euskarara hurbiltzeko eta hura ikasteko konpromisoa hartu dutelako urte askoan. Bide horretan, gure esku dauden erraztasun guztiak ematen jarraituko dugu".
Matrikulazioa irekita dago eta dagoeneko hasi dira ikasleak izena ematen. Euskaltegian jarraituko duten ikasleetako bi dira Juan Puerta eta Raul Montero. Gustura joaten dira euskaltegira “giro ona” dutelako ikasteko. Puerta duela bi urteatik bizi da hemen eta iazko ikasturtean bi maila batera egin zituen euskaltegian: “Lanerako beharrezkoa dut. Ertzaina naiz, eta herritarrekin ditudan hartu-emanetarako, elkar ulertzeko zein dokumentuak euskaraz egiteko beharrezkoa dut. Horretaz gain, nire bikotekidearen familia euskalduna da, eta euskara ezinbestekoa dut haiek eta haien izateko modua ulertzeko”. Raul Montero, berriz, azpeitiarra da, eta betidanik egin du euskaraz. “Euskara hobetzeko hasi nintzen euskaltegian duela bi urte. Aurten C1 maila egingo dut euskaltegian, eta erronka edo mugarri bat da niretzat hori”, azaldu du.

Inge Beloki Udal Euskaltegiko zuzendariak herritarrak animatu nahi izan ditu: “Euskaraz 0tik ikasi nahi edo behar duenarentzat, bere euskara hobetu nahi duen azpeitiarrarentzat, etorkinentzat, lanerako euskara behar duenarentzat… guztientzako ikastaroak ditugu, behe mailetatik hasi eta C2 mailara arte. Interesa duena etor dadila eskaintzaren eta aukeren berri jasotzera udal euskaltegira”.

Euskaraz doan ikasteko aukera zabalik

Irailaren 24ra bitartean, astelehenetik ostiralera, 9:00etatik 18:00atara udal euskaltegian izango da informazioa jaso edo ikastaroetan izena emateko aukera. Bertan, ikastaroen eskintzaren inguruko informazioaz gain beka sistemaren inguruko xehetasunak ere azalduko dizkiete interesa dutenei. Izen ere, duela zenbait urte jarritako beka sistemaren bidez, euskara doan ikas daiteke Azpeitian, hainbat baldintza betez gero.

Ikastaro motzak ere bai

Urteroko ohiko ikasturte osoko ikastaroez gain, udaberrian abian jarritako, euskararen ezagupena errazteko ikastaro motzen eskaintzari jarraipena emango zaio udazkenean.

Hala, bi ikastaro motz emango dira urtea bukatu bitartean:
Ulersaioak: irailaren bukaeratik azarora, 2 orduko 3 saio astean (60 ordu guztira). Ikastaro hau Aldaitz ikerketaren baitan eskainiko da eta ezinbestekoa izango da euskaraz ez ulertzea. Ezer ez ulertzetik ulermenean A2 maila izateko gaitasuna lortzea da helburua eskaintza honetan.
Merkatariei zuzendutako ikastaroak: urritik abendura bitartean, 20 ordu inguruko ikastaroak.