Itzulpen automatikoa / Machine translation

Maila guztietan euskara doan ikasteko aukera izango da Udal Euskaltegian

2023/09/07
Maila guztietan euskara doan ikasteko aukera izango da Udal Euskaltegian

Euskara ikasi edo hobetu nahi duen ororentzako eskaintza prest du Udal Euskaltegiak. Ikasturte berriko eskaintzan izena emateko epea irekita izango da irailaren 27ra bitartean. Azpeitian euskaraz doan ikas daiteke, beka sistemaren bidez. Ikasturte berriari, gainera, egoitza berrian emango zaio hasiera; Perez Arregi Plazako Telefonikako eraikin zaharreko lehen solairuan.


Euskaraz jakin arren, hobetu edo tituluren bat atera nahi dutenentzat, euskaraz ikasten hasiak direnentzat, lehen urratsak eman nahi dituztenentzat.... herritar guztientzako moduko eta denetariko ikastaroak antolatuko dira aurtengorako. A1, A2, B1, B2, C1 eta C2 mailetako tituluak ateratzeko aukera eskaintzen da. Saioak, goiz, arrats zein gauez dira, eta eskaintza zabala egiten da euskaraz ikasteko.

Azken urteotako esperientzia ona ikusirik, hainbat mailatan online eskaintza ere egingo da; hau da, euskara ikasi nahi dutenei erraztasunak eman nahi zaizkie horretarako. Horrela, Udal Euskaltegiak herritarrei eskaintzen zaien zerbitzua zabaldu eta hobetzea da helburua. Norberak ondoen doakion maila eta modalitatean ikasteko. Matrikulazioa irekita dago eta dagoeneko hasi dira ikasleak izena ematen.

Egoitza berria, Perez Arregi plazan

Azpeitiko Euskara Patronatuak eta Udal Euskaltegiak ikastrte berri honi, gainera, egoitza berrian emango diete hasiera. Dagoeneko Perdilegiko eraikina utzi eta Perez Arregi Plazako Telefonika zaharraren eraikin berrituko lehen solairuan dira zerbitzu guztiak. Beraz, matrikulazio kanpainako edozein kontsulta edo matrikula egiteko bertara joan behar dute interesatuek. 

Euskaraz doan ikasteko aukera zabalik

Irailaren 27ra bitartean, astelehenetik ostiralera, 9:00etatik 18:00atara udal euskaltegian izango da informazioa jaso edo ikastaroetan izena emateko aukera. Bertan, ikastaroen eskintzaren inguruko informazioaz gain beka sistemaren inguruko xehetasunak ere azalduko dizkiete interesa dutenei. Izen ere, duela zenbait urte jarritako beka sistemaren bidez, euskara doan ikas daiteke Azpeitian, hainbat baldintza betez gero.