Molde berriko etxebizitzak eraikitzeko prozesuko lehen bilera, asteartean 19:00etan Sanagustinen egingo da

Azpeitiko Udalak, molde berriko etxebizitzak hutsetik abiatuta herritarren beharren arabera erabakiak hartu eta diseinatzeko prozesua jarri du abian. Hala, martxoaren 26an, 19:00etan, Sanagustin Kulturgunean prozesuaren nondik norakoak azaldu eta Euskal Herriko eta munduko hainbat etxebizitza eredu ezagutzeko aukera izango da Hiritik-at tokiko garapena sustatzeko espazio, prozesu eta estrategiak sortzen dituen kooperatibaren bidez. 

Prozesu ireki eta zabala

Prozesu irekia eta zabala egin nahi da, herritar orok har dezake parte. Hala ere, gazteak izanik etxebizitza behar handieneko kolektiboa, Udalak, batez ere, sektore hori animatu nahi du prozesuan parte hartzera.

Prozesuaren koordinazioa Hiritik-atek emango du. Aurrez ere molde berriko etxebizitzen inguruko garapen prozesuak egin izan dituzte; Errenteria eta Usurbilen, besteak beste.