Musika eta herriko ondarea lotzen dituen zikloa

Udako Musika Printzak zikloaren bosgarren edizioa aurkeztu dute, gaur goizean, Leire Sarasua Azpeitiko Udaleko Kultura batzordeburuak, Ignacio Arakistain zikloaren sustatzaileak, Joseba Zabaleta Oiartzungo Organozaleak Elkarteko kideak eta Lucia Arzallus eta Iker Bilbao Easo Sinfoniettako kideek.

Musika ezohiko tokietara eramaten du Udako Musika Printzak zikloak, eta, aurten, Madalenako ermitaren ataria eta Enparan Dorretxearen atzealdea dira aukeratutako tokiak. “Zikloak urtero txoko berriak bilatzeko ahalegina egiten du, hori da bere berezitasunetako bat, eta hori da jendeari gehien gustatzen zaion gauzetako bat”, esan du Sarasuak.

Musika klasikoa izaten dute oinarri kontzertu guztiek, baina elkarrengandik oso ezberdinak izaten dira emanaldiak. “Mota horretako musika entzuteko ohiturarik ez dutenak ere gonbidatuko nituzke kontzertuetara etortzera, seguru sorpresa polita hartuko dutela eta”, gehitu du zinegotziak.

Programaren xehetasunak

Azken urteetan bezala, hiru kontzertuk osatuko dute zikloa. “Uste dut kopuru egokia dela, jendeari barietatea eskaintzeko, baina gehiegi nekatu gabe”, esan du Arakistainek.

• Uztailak 10, osteguna, 21:00etan, Madalenako ermitaren atarian: Aire (H)ari bikotea.

Oscar Rodriguez Santanderko (Espainia) musikaria ariko da harmoniumean eta Ignacio Arakistain bera pianoan. “Nahiko berezia da harmonium bat martxan ikustea, organoarekin alderatuta, gutxiagoko tresnatzat hartu izan baita”, kontatu du Arakistainek. Oiartzungo Organozaleen Elkarteak ekarriko du tresna Azpeitira. Elkarte horretako Zabaletaren esanetan, azken 60-70 urteetan gutxi erabili izan da harmoniuma. “Ondorioz, jotzeko ohitura eta, neurri batean, teknika galdu egin dira gure inguruan. Tresna berezia da, zenbat haize botatzen den hankarekin kontrolatu behar baita. Zorionez gure inguruan baditugu interesa jarri duten gazte musikariak, eta orain etxeko jendearekin ari gara programatzen”.

• Uztailak 17, osteguna, 21:00etan, Enparan Dorretxearen atzealdean: Easo Sinfonietta.

Talde nahiko berria da Easo Sinfonietta. “Easo abesbatzaren komunitatearen parte gara, eta kide amateurrek eta profesionalek osatzen dugu”, kontatu du Bilbaok. Ia bi urteko ibilbidean hainbat jaialditan parte hartu dute. Arzallus musika zuzendariak azaldu duenez, bi parte izango ditu beren emanaldiak. “Lehen partean, Carl Reineckeren flautarako kontzertua joko dugu. Kontzertu hau oso garrantzitsua da flautaren errepertorioan, eta gure bakarlaria Nerea Goñi izango da”. Bigarren zatian, Manuel de Fallaren El Amor Brujo joko dute, Mireia Galarza azpeitiarra narratzaile lanetan dela. “Euskaraz izango da, eta hori ere oso berezia da”.

• Uztailak 18, ostirala, 21:00etan, Enparan Dorretxearen atzealdean: Mucalinda hirukotea, flamenkoa.

Arakistainek azaldu duenez, esperimentaziorako lekua da Udako Musika Printzak zikloa, eta horren adibide da Mucalinda hirukoteak eskainiko duen emanaldia ere. “Bertsioak egiten dituzte askotan, euskal melodienak-eta. Bi gitarrista eta perkusionista bat dira, eta iruditu zitzaidan ziklo honi beste ate bat zabaltzea zela flamenkoko emanaldi hori”.
Zikloa iragartzen duen karteleko irudia Miriam Kintanak egin du.