Nerabeen gurasoekin kafe solasaldia egingo dute asteartean

Nerabeen gurasoek aipatu ohi duten kontuetako bat da faltan botatzen dutela antzeko egoeran daudenekin elkartzea eta beren bizipenak partekatzea. Izan ere, seme-alabak txikiagoak direnean, ohikoagoak izaten dira harreman horiek, hala nola ikastetxe atarian edo parkean.

Era berean, gurasoek eskertzen dute beren seme-alaben eguneroko bizitzaren parte diren beste pertsona heldu batzuen ikuspegia. Horiek guztiak kontuak hartuta, nerabeen gurasoekin kafe solasaldia egingo dute datorren asteartean (martxoak 19). 18:00etan izango da, Basazabal Jauregian.

Gaztelekuko hezitzaileek eta Janire Basurto orain gutxi udalak martxan jarri duen familia-orientazio zerbitzuko psikologoak gidatuko dute saioa. Zalantza ugari eragin ohi dituen gai bat izango dute hizpide nagusi: Nerabezaroa eta gurasotasuna: arauak eta mugak zer?

Informazio gehiago nahi izanez gero, deitu 943157161 telefonora edo idatzi gazteria@azpeitia.eus helbidera.