Nerabezaroa ezagutu eta ulertzeko helburuz Guraso Eskolak egingo dira apirilean eta maiatzean

Nerabezaroa aldaketa askoko etapa da bizitzan. Zaila nerabeentzat bizi dituzten aldaketak ulertzeko; eta zaila gurasoentzat bizi dituzten aldaketetan laguntzeko. Zailtasun, ezintasun eta kezka horien inguruko formazioa eskaintzeko helburuz, Guraso Eskolen bidez, garai horren inguruko gai eta ertz ezberdinak lantzeko saioak antolatu dira. Apirilaren 25etik maiatzaren 31ra bitartean gai desberdinak lantzeko 5 saio egingo dira. Batez ere nerabeen gurasoei zuzenduta daude, baina edozien herritarrek har dezake parte. 

Nerabezaroaz, nerabeez, aldaketa handiko aroaz, kezkez, arazoez eta esperientziez hitz egiteko helburuz antolatu dira aurtengo Guraso Eskolak. Nerabezaroan gertatzen diren aldaketak ertz desberdinetatik aztertzeko asmoz antolatu dira saioak. Otsailean, ikastetxeetako zuzendaritzek eta udalak bultzatuta, nerabeen gurasoekin saio ezberdinak antolatu ziren. Jasotako zalantza eta kezkak kontuan izanik, nerabezaroan ohikoak sortzen diren gaiak lantzeko hitzaldi ezberdinak antolatu dira oraingoan. 

Leire Goenaga Hezkuntza zinegotziak hitzaldi horiek ikastetxeetan ditugun proiektuetan gidari dabiltzan elkarte edo/eta adituek emango dituztela zehaztu du. Zehazki, sare sozialen erabilera eta adikzioen prebentzioan lan egiten duten Hazkunde elkarteko Maddi Oteiza, esku hartze goiztiarran lanketa egiten duen Luis Legorburu eta Hezkidetza proiektuko arduraduna Harremanak taldeko Mireia Agirre. Gurean izango da baita ere, Foru Aldundiko Treba programako Estibaliz Ansotegi eta Gaztelekuko hezitzaileek gidatuko dute azken saioa. "Aurtengo ikasturtea bukatzear dago baina datorren ikasturtean ere, ikastetxeetan ikasleekin gai horiekk lantzen joango gara eta gurasoekin ere lanean jarraituko dugu proposamen berriei helduz eta gai ezberdinak landuz". 

Luis Legorburu eta Mireia Agirrek elkarrekin emango dituzte lehen bi saioak. Lehen saioan, "nerabeei buruz hitz egitean helduen begirada aldatu beharraz" hitz egingo dutela azaldu zuen Legorburuk. "Askotan ideia finko batzuk izaten ditugu eta nerabezaroko arazoei gure ideietatik erantzuten diegu. Nerabetasuna zer den aztertu eta izaten diren aldaketa fisiko, afektiboan, politikoan eta sozialean landuko dugu". Aldaketa psikoafektiboan sakonduko dute eta hor Atxikimenduaren teoriari garrantzia berezia emango diote: "Atxikimendu egoki bat egiteak nerabeen garapenean eragin nabarmena du. Nerabe baten garapenean arazoak daudenean, oinarrian, atxikimenduan begiratu behar izaten dugu, eta horixe landuko dugu". Bigarren saioan, berriz, seme-alaba eta gurasoen arteko komunikazioa landuko dute: "Lehen saioaren jarraipena izango da. Familietan askotan nerabeekin izaten den komunikazio etenalanduko dugu. Nerabezaroa ulertu eta nerabeekin nola komunika gaitezkeen aztertuko dugu. Askotan komunikazio mezuetan baino harremanetan izan diren aldaketetan dago gakoa", gaineratu du Agirrek. 

Sare sozialen mundua ezagutzeko eskainiko du hirugarren saioak. Hazkunde Elkarteko Maddi Oteizak gidatuko du eta bere hitzetan, "sare sozialek nerabeetan duten inpaktua eta eragina ulertzen saiatzeko" saioa izango da. "Arriskuez eta abantailez arituko gara. Aurreko saioetan gazteekin komunikatzeko eginiko lanketa eta ikasitako estrategiak baliatuz sare sozialetan izan ditzaketen arrisku eta zailtasunen aurrean izan beharreko estrategiak landuko ditugu". Horretaz gain, ordea, gurasoei sare sozialen inguruko informazioa emango zaie  "eguneratuta egoteko eta aurrera egin ahal izateko". 

Laugarren saioa sustantzien kontsumoaz izango da eta Estibaliz Ansotegik eskainiko du Gipuzkoako Foru Aldundiaren Treba programaren bidez. Hitzaldi horretan, nerabeetan sustantzien kontsumoak detektatuz gero zein helduleku edo estrategia izan ditzaketen landuko da. "Horrelako kasuetan eta arazo larria bihurtu aurretik familiak asko egin dezakeela jakitun, zer egin dezakeen azalduko da. Familian, uste baino gehiago egin baitaiteke horrelako kasuen aurreaz", azaldu du Goenagak. 

Eskolei bukaera emateko, Gaztelekuko hezitzaileek gidatutako saioa egingo da. "Gaztelekuko hezitzaileak garen momentutik, nerabeen egunerokoa gertutik ezagutzen dugu. Nerabeek nola bizi duten beren egunerokoa azaldu genien saioetan eta gurasoen kezkak eta beharrak ere jaso genituen. Hortik abaiatuta sortu dira eskola hauek eta gure solasaldia bukaera baino zerbait politaren hasiera izateko aukera izatea espero dugu". 

Guraso eskoletako saioak

Saio guztiak 18:00etatik 19:30era bitartean Azoka Plazako areto nagusian (1. solairuan) izango dira. 

Apirilak 25, asteartea
Nire seme-alaba aldatu egin da eta ez dakit zer egin.
Mireia Agirre (Harremanak) | Luis Legorburu (Orekagune)

Maiatzak 2, asteartea
Komunikazioa gure seme-alabekin
Mireia Agirre (Harremanak) | Luis Legorburu (Orekagune)

Maiatzak 9, asteartea
Sare sozialen munduan murgildu nahi?
Maddi Oteiza (Hazkunde)

Maiatzak 16, asteartea
Substantzien kontsumoa. Zer egin dezake familiak?
Estibaliz Ansotegi Guruziaga (Ortzadar)

Maiatzak 31, asteazkena
Nerabeen gurasoekin solasaldia
Gaztelekuko hezitzaileak