'Noiz eta nola eman mugikorra seme-alabei' mahaingurua egingo da apirilaren 26an

Herriko ikastetxeetako guraso elkarteek eta udalak herri mailan gaian sakontzeko helburuz antolatu dute saioa. Apirilaren 26an, 18:00etan Sanagustinen izango da. Bertan,  Telmo Lazkano No phone Challenge mugimenduko kidea eta Tolosa eta Usurbilgo ikastetxeetako ordezkariak izango dira beraien lanketak eta hausnarketak azaltzen. 

Teknologia berriek eta sare sozialen presentzia gero eta handiagoa da gizartean. Gero eta digitalagoa da gizartea eta horrek haurrengan duen eraginarekin kezkatuta ikastetxeetako guraso eskalteak lanketa desberdinak egin dituzte ikastetxeetan. Gaian sakondu eta herri gisa lanketa baten beharra egin beharra ere ikusi zuten, ordea. Eta udalarekin duten elkarlanaren baitan, denen artean 'Noiz eta nola eman mugikorra seme alabei' mahaingurua antolatu dute apirilaren 26rako. 18:00etan hasita izango da Sanagustinen eta bertan parte hartuko dute, Telmo Lazkano No phone Challenge mugimenduko kidea eta Tolosa eta Usurbilgo ikastetxeetako ordezkariakiak, beren esperientziak azaltzeko. Mahaingurua aurkezten izan dira gaur Iraurgi ikastetxeko guraso elkarteko Iratxe Alkorta, Jaione Porras Karmelo Etxegarai Ikastolako Zutarri guraso elkartekoa, Garikoitz Uzkudun Azpeitiko Ikastola Ikasberriko guraso elkartekoa eta Leire Goenaga Udalaren Hezkuntza batzordeburua. 

"Egun pantailak, sare sozialak eta teknologi berriak gure gizartean oso txertatuak daude. Teknologi berriak oso azkar aurrera doaz eta ondo erabiliz gero oso tresna baliagarriak izan daitezke. Hala ere, haurren eskuetan daudenean arriskuak haundiagoak izan daitezke", azaldu du Goenagak.  Ikasturtean zehar ikastetxeetan guraso elkarteetako kideak haurren artean egiten den mugikorraren eta pantailen erabileraz kezkatuta hainbat aldiz elkartu direla zehaztu du: "Guraso talde bakoitzak beren ikastetxeko lanketaz gain, herri mailan eta hiru ikastetxeetako gurasoek talde eragile bat sortu dute. Talde eragileak udalera jo zuen pantailen eta mobilen erabileran hausnarketa kolektibo bat egin eta herrira zabaltzeko eta hortik sortu da mahaingurua".  

Alkortak, gurasoei mugikorren erabilerak "buruko min asko sortzen" dizkiela azaldu du: "Zein da adin egokia? Nola arautu erabilera?" Horren harira, herri ezberdinetan teknologiaren lanketa egin eta mugikorra emateko adina atzeratzeko taldeak osatzen hasiak dira. "Pantailen eta mobilen erabilera gurasoen erabaki indibiduala den arren, kolektiboki hausarneta egitea nahi dugu. Haurrak parkean eta kaleetan jolasean ikusi nahi ditugu eta ez mobilei edo pantailei begira", zehaztu du.  Haurrei mugikorra eman baino lehen lanketa bat egin beharra azpimarratu du: "Udalak ere badu ikastetxeetan gazteekin lantzeko prebentzio saioak; bai gazteekin zein gurasoekin ere eta horregatik ari gara elkarlanean". 

Porrasek hitzetan, gero eta herrialde eta erakunde gehiago ari dira pantailen erabilerak haurrengan duen eragina aztertzen: "Euskal Herrian ere pediatrak hasi dira pantailen erabileraren inguruko galderak egiten".  Frantziako pediatria elkarteren ikerketa baten arabera, 0-3 urte arteak ahalik eta gutxien erabili behar dira pantailak; 3-6 urte bitartean beren tresnarik ez izatea gomendatzen dute; 9 urtetik 12ra gune komunetan bakarrik erabiltzeko aholkua egiten dute eta 12 urtetik aurrera helduen gidaritzapean egitea gomentatzen dute. "Denok dakigu erabilera okerrak ekarri ditzakeen egoera larriaz; pantailen erabilerak ikasketa prozesuan eragina izan dezake. Adituek ari dira esaten pantailen aurrean denbora asko pasatzeak, hizkuntzan atzerapenak dakartzatela edo irakurmen gaitasuna txikiago dutela". Arriskuez gain ordea formazioan ere jarri nahi dute azpimarra: "Gai honetan ere formazioa beharrezkoa dela ikusten dugu baina oraingoan ez dugu zentratu nahi dakartzan arriskuez bakarrik. Pausu bat aurrera eman nahi dugu". 

Mahainguruaren xehetasunak

Mahaingurura Telmo Lazkano irakaslea  eta psikologian formatua eta sare sozialetan aditua gonbidatu dute. Bera No phone challenge proiektuaren sortzailea da eta proiektu horren nondik norakoak azalduko ditu. "Berak adibide gisa adierazten du 18 urte izan arte gida baimenik ezin dela atera, kotxearen erabilerak ardura haundia eskatzen duelako. Eta gida baimena lortzeko bidean formakuntza bat ere beharrezkoa da. Mobilaren eta sare sozialekin ere berdin gertatzen dela dio. Adinak eta formazioak garrantzi haundia dutela dio eta hauen erabilera goiztiar eta okerrak berebiziko garrantzia dute", azaldu du Uzkudunek.

Bestalde, Tolosako eta Usurbilgo guraso taldeak ere izango dira beren esperientziak azaltzen: "Beren asmoak, helburuak eta ibilbidea azalduko digute eta uste dugu gurean ere badutela lekua beren moduko proiektuak.

Beraz, eta hasieran esan dugun bezala guraso bakoitzaren erabaki indibiduala den arren, erabakiak ingurunean, klasean eta lagunartean eragin haundia duela uste dugu eta denon artean egin nahi dugu hausnarketa hau.

Kezka orokorra dela uste dugu. Bakoitzak ahal bezala aurre egin beharrean, elkarrekin zerbait egin dezakegula uste dugu".