Ostegunean, bideo emanaldia izango da Soreasun, EA2030 egitasmoan landutakoa ezagutarazteko herritar guztiei

Herriko ikastetxeetako ikasleek Eskola Agenda 2030 programaren barruan egin duten lana ezagutzeko aukera izango dute herritar guztiek datorren astean. Ostegunean, maiatzak 30, 19:00etan, bideo emanaldi bat izango da Soreasu antzokian. Azpeitiko Udalak igerilekuan energia aurrezteko eta energia berriztagarriak ezartzeko hartu dituen neurriak biltzen ditu bideoak, eta DBHko ikasleek egin dute.

2022-2023 ikasturtean, metodologia berria hartu zuen EA2030 egitasmoak. Ordura arte, programaren iraupena ikasturte batekoa zen, eta, urtero, diagnosia egin ostean, alkateari hainbat eskaera zuzentzen zizkioten; metodologia berriarekin, aldiz, programaren iraupena bi urtera luzatu da: lehen ikasturtea diagnosia eta esku-hartze planaren diseinua egiteko, eta, bigarrena, esku-hartze plana martxan jartzeko.

Esku-hartze plana

Bi urteko lan hori bukaerara ari da iristen. Iazko ikasturtean, Energia, bizitzaren motorra gaia jorratu zuten ikasleek, eta diagnostiko horretatik bost proiektu atera ziren.

2023-24 ikasturte hasieran, Azpeitiko ikastetxe guztiek adostu zuten udal igerilekuan energiaren kontsumoa murrizteko eta berriztagarriak sustatzeko udalak hartu dituen neurriak herritarrekin partekatzeko informazio-sentsibilizazio kanpaina diseinatzea eta gauzatzea.

Kanpaina hau gauzatzeko, LHko ikasleek infografiak egin dituzte, QR bidez informazioa zabaltzeko eraikin publikoetan (udaletxea, liburutegia, auzitegia, kiroldegia…). DBHkoek, berriz, bideo bat sortu dute.

Datorren ostegunean, ikasleen ordezkariak Nagore Alkorta alkatearekin eta zinegotziekin elkartuko dira egin duten lana partekatzeko. Ondoren, 11:15ean, DBHkoek egin duten bideoaren emanaldia egongo da Soreasun ikasleentzat. 19:00etan, berriz, herritarrek izango dute bideoa ikusteko aukera antzokian bertan.