Ostegunetik aurrera eman ahal izango da izena literatura, arte eta historia ikastaroan

Urriaren 7an hasiko da literatura, artea eta historia lantzen dituen ikastaroa, eta ekainera arte iraungo du. Astelehenetan izango da, 17:00etatik 19:00etara, Basazabal jauregian. Deustuko Unibertsitateko irakasleek gidatuko dituzte saioak, eta XIX. eta XX. mendeko artea eta kultura landuko dituzte ikasleek.

Ikastaroa interesatzen zaienek Azpeitiko Udaleko hezkuntza zerbitzuan entregatu beharko dute izen-emate inprimakia, ordainagiriarekin batera. Irailaren 12tik 20ra arte izango dute horretarako aukera. Azpeitiarrek 40 euro ordaindu beharko dute, eta Azpeititik kanpo bizi direnek, 50 euro.

Azpeitiko Helduen Hezkuntza Eskolan sortu zen literatura, arte eta historiako taldea, irakurketa talde moduan. Han eskaintza bertan behera geratu ostean, gaur egun Azpeitiko Udalak eskaintzen du ikastaroa.

Haren bidez, pertsonen ahalduntzea aktibatu nahi da, aldez aurreko prestakuntza akademikoa alde batera utzitz. Hain zuzen, helduen prestakuntza eta aisialdiko esperientziak berrikuntza sozialeko, garapen pertsonaleko eta hobekuntza komunitarioko prozesuak sortzen dituzten gune bihurtzen dira.