Parte-hartze prozesu berritzaile bat, Frontoi Txiki ondoko eremuan

Haizete batek Gernikako arbola bota ostean, zabalgune bat geratu da frontoi txiki ondoan. Aurrerantzean, eremu hori alde zaharreko bizilagunen topaleku eroso bat izatea nahi da. Horretarako, esperientzia pilotu bat jarri du martxan udalak, Hiritik At eta OinHerriren laguntzarekin.

Bi berezitasun nagusi izango ditu prozesuak. Alde batetik, udaleko sail ezberdinen arteko lankidetza izango duela oinarri; bestetik, parte hartzeko bestelako metodologia bat sustatzeko ahalegina egingo dela. Gaurko aurkezpenean izan dira prozesuan parte hartzen ari diren Parekidetasun Saileko, Emakume Txokoko, Hezkuntza Saileko, Hirigintzako, Gazteriako, Udaltzaingoko eta Ekoetxeko teknikariak; Oinherriko eta Hiritik Ateko ordezkariak; eta udal zinegotziak.

Herri hezitzaileen sareko kide da Azpeitia, eta horren baitan egiten diren proiektuak irudikatzen dituen koloretako aterkiarekin atera dute argazkia. Izan ere, eremuaren eraldaketak ere bat egiten du herri hezitzaileen balioekin.

Ander Larrañaga zinegotziak azaldu duenez, frontoi txiki ondoan sortu den aukera baliatu nahi du udalak espazio publikoa herritarrekin berreraikitzeko, hirigintza eredu “hezitzaileago” batekin. “Eragileen arteko lankidetzan oinarrituko gara espazio honen eraldaketa prozesuan, eta, horretarako, udazken osoa iraungo duen esperientzia pilotu bat jarriko dugu martxan”. Alde zaharrean dago eremua, eta alde zaharrari “arnasgune” bat eskainiko dion zabalgune bat diseinatzea dela helburua gaineratu du.

Udaleko sailen arteko lankidetzaren garrantziaz aritu da Edurne Korta Hezkuntza teknikaria. “Herri hezitzaile baten lanketak sailen arteko elkarlana eskatzen du, besteak beste, baita hirigintza proiektuetan ere. Horretan hasita gaude, eta frontoi txiki ondoko proiektu honetan ere elkarrekin ariko gara udaleko hainbat sailetako lankideok”. Zehaztu du, antolaketa horrekin, “modu egokiagoan edo integralagoan” erantzun nahi zaiela hirigintza proiektuei.

“Bestelako ahotsak” jasotzeko nahia

Udaberrian hasi zen udala lanketarekin. Foro bat osatu, eta espazioaren informazioa bildu zen; ondoren, parte-hartze prozesuaren diseinuari ekin zitzaion. Hiritik At eta OinHerriren laguntza izan du udalak horretarako. Maite Azpiazu OinHerriko kideak azaldu du nola gauzatuko den parte-hartze prozesua. Haren esanetan, berritzailea da proiektua, “parte-hartzearen bidez, bestelako ahots eta gorputz batzuen beharrak nola jaso ditzakegun pentsatu dugulako elkarrekin”.

Diseinatutakoa praktikan jartzeko unea izango da udazkena. “Gero balorazio bat egingu dugu, zertan asmatu dugun identifikatzeko, eta ea hortik gai garen parte hartzeko metodologia ezberdin bat sistematizatzeko”.

Parte-hartze prozesua:

1. fasea: urriak 28 – azaroak 1 astea

Lehentasunezko herritar taldeen beharrak jasotzeko parte-hartze saioak egingo dira eremuan bertan, bakoitzaren erritmo eta ezaugarrietara egokitzen diren metodologien bidez. Haurrak, nerabeak, emakume atzerritarrak, zaintzaileak, aniztasun funtzionala dutenak eta alde zaharreko bizilagunak izango dira lehentasunezko herritar talde horiek.

Jada espazio hori erabiltzen duten eragileekin elkarrizketak egingo dira, zertarako, zenbatetan eta erabiltzeko dituzten behar espazialak jasotzeko. Eragile hauekin egin nahi da lanketa: Ilunpe pilota elkartea, Zezen Beltz, Elkar Ekin, Bertan, Jauzika, Baigera, Atzegi, Gautena, Marea Urdina, Goienetxe, Osamen eta Once.

2. fasea

Lehen faseko ekarpenak aztertuta, proposamen espazial bat osatuko du lan taldeak, eta berriro elkartuko dira lehen faseko partaideekin, ekarpenak jasotzeko.

3. fasea: abenduak 18

Parte-hartze prozesuan parte hartu duten herritar talde zein eragile guztiekin batera deboluzio saio bat egingo da, eraldaketa espaziala aurkezteko eta prozesua baloratzeko.