Plaza libreak, Emakumeen Txokoko ikastaro gutxi batzuetan

Jabetze Eskola, ikastaro iraunkor, hitzaldi eta bestelako egitasmoz beteta dator udazkena Emakumeen Txokoan. Joan den ostiralean amaitu zen izen-emate epea, baina ikastaro gutxi batzuetan plaza libreak geratu dira, eta horietan matrikula egiteko epea zabaldu egin du udalak.

Hauek dira plaza hutsak dituzten ikastaroak:

• Emakumeen osasuna ikuspegi feministatik: gure osasuna baldintzatzen duten faktoreak ezagutzen eta ulertzen. Aurtengo ikasturtean Pepa Bojó psikologo feminista gurean izango dugu azkenean. Asko izan zarete faltan bota duzuenak eta, eskaera horri erantzunez, lortu dugu Bojók Jabetze Eskoletan ikastaroa eskaintzea. Hain zuzen ere, urrian hasita, Emakumeen osasuna ikuspegi feministatik ikastaroa eskainiko du. Bertan, faktore sozialek eta genero-sozializazioak emakumeen osasunari nola eragiten dioten aztertuko dugu. Ondoezaren kausak eta gure ongizatea modu kontzienteagoan hobetzeko estrategiak aztertuko ditugu.
Formatzailea: Pepa Bojó
Hizkuntza: Gaztelera
Noiz: urriak 8, 15, 22 eta 29, azaroak 5, 12, 19 eta 26 eta abenduak 3, 10 eta 17
Ordutegia: astearteetan, 18:00etatik 19:30era
Iraupena: 1,5 orduko 12 saio (18 ordu)
Tokia: Azpeitiko Emakumeen Txokoa
Prezioa: 20 €
Izen-ematea: urriaren 4ra arte

• Podcast feminista (Kulturaz Kooperatibarekin elkarlanean). Kolektiboan podcastak sortzera bideratutako ikastaroa izango da. Gidoiak idatzi, mikrofono aurrean hitz egin, teknika kontrolatu eta amaierako edizio lanak nola egiten diren ikasiko dugu. Jolasa eta esperimentazioa oinarri, ahotsezko komunikazioa lantzea da asmoa; sormenari, umoreari, lotsari, soinuari zein isiltasunari leku eginez.
Ez da inongo ezagutza berezirik behar ikastaroan parte hartzeko. Podcast baterako ideiaren bat baduzu, edo besterik gabe, jolaserako eta zeure burua probatzeko gogoa, animatu.
Formatzailea: Eneritz Arzallus
Hizkuntza: Euskara
Noiz: urriak 18 eta 25, azaroak 8 eta 9 eta azaroak 15
Ordutegia: ostiraletan, 17:00etatik 19:00etara, eta larunbatetan, 10:00etatik 14:00etara
Iraupena: bi orduko lau saio eta lau orduko saio bat (12 ordu)
Tokia: Azpeitiko Emakumeen Txokoan (lehenengo saioa) eta Dinamoa sormen gunean
Prezioa: 15 €
Izen-ematea: urriaren 14ra arte

• Arteterapia. Arteterapia sorkuntza eta ezagutza bidaia bat da, norbere espazio intimoetatik deskubritzeko dauden leku berrietara garamatzana. Bidaia hau esperimentazio artistikoak gidatuko du: sormena, jolasa eta musikaren laguntzaz, gorputzarekin konektatu, emozioak kudeatu eta harremanak garatzea dugu helburu. Espazio honek aukera emango digu gelditu, sentitu eta hausnartzeko, emakume bakoitza bere potentzialaz jabetuz.
Formatzailea: Irantzu Iturbe
Hizkuntza: Euskara
Noiz: urriak 17 eta 19, azaroak 6 eta 9 eta abenduak 12 eta 14
Ordutegia: Ostegunetan, 17:30etik 19:30etara, eta larunbatetan, 10:00etatik 13:00etara
Iraupena: bi orduko hiru saio eta hiru orduko hiru saio (15 ordu)
Tokia: Azpeitiko Emakumeen Txokoa
Prezioa: 18,5 €
Izen-ematea: urriaren 11ra arte

• Batukada feminista. Ikastaroaren helburuak dira emakumeon arteko harremanak eta elkartasuna sustatzea, musikaz gozatu eta gozaraztea, gure irudimena eta sormena garatzea. Horrez gain, auto-garapena eta taldekako jabetzea bultzatzea, emakumeok kulturan dugun parte hartzea indartzea, eta emakumeok eta feministok ikusiak eta entzunak izatea esparru publikoan.
Formatzailea: Ainara Sarasketa eta Arantza Albizu
Hizkuntza: euskara
Noiz: urriak 14 eta 28, azaroak 11, abenduak 2 eta 16, urtarrilak 20, otsailak 3 eta 17, martxoak 3, 17 eta 31, apirilak 28, maiatzak 12 eta 26 eta ekainak 9
Ordutegia: Astelehenetan, 18:00etatik 20:00etara (bi astean behin)
Iraupena: bi orduko 15 saio (30 ordu)
Tokia: Hilean behin Azkoitiko Xabier Muniben eta beste behin Azpeitiko Emakumeen Txokoan
Prezioa: 37 €
Izen-ematea: urriaren 4ra arte