Segurtasuna bermatzeko, Loiolako lorategiak itxi egingo ditu udalak bihar goizean

Haizea dela eta, alerta laranja ezarri du Eusko Jaurlaritzak Gipuzkoan biharko. Segurtasuna bermatzeko, Azpeitiko Udalak erabaki du Loiolako lorategiak ixtea 06:00etatik 15:00etara.

Herritarrentzako hainbat gomendio ere eman ditu Jaurlaritzak:

• Itxi ateak, eta finkatu leihoak eta olanak.
• Kendu lorontziak eta kalera eror daitezkeen gauza guztiak.

Kanpoan bazaude:

• Behar-beharrezkoa ez bada, ez joan mendira adierazitako ordu horietan, eta, joan behar baduzu, babes-neurri egokiak hartu.
• Urrundu erlaitzetatik, hormetatik, zuhaitzetatik edo publizitate-hesietatik, eta kontu handiz ibili eraikitzen ari diren edo egoera txarrean dauden eraikinen aurrean bazaude.
• Aldamioak, garabiak eta obrako bestelako elementuak finkatu.

Bidaiaren bat egingo baduzu:

• Ahal bada, ez egin errepideko joan-etorririk, eta, edonola ere, aurrez neurriak hartu. Informa zaitez joango zaren edo igaroko zaren aldeko meteorologia-baldintzei buruz.

Itsasaldean bazaude:

• Urrundu zaitez haize gogorrek eragin ditzaketen olatuen eta mareen eragina jasan dezaketen lekuetatik.
• Ez erabili itsasontzirik, eta berrikusi horien amarrak. Ez egin uretako kirolik.