Sistiaga errekako bidea konpontzeko lanak hasi ditu udalak

344.003,67€ko inbertsioa egingo du udalak Sistiaga errekako baserri bide hori konpontzeko. Lanak Altuna y Uria enpresak egingo ditu; dagoeneko hasita daude eta lau hilabeteko iraupena izango dute. 

Sistiaga errekan hondoratutako magala egonkortu eta errepidea konpontzeko obrak hasi ditu udalak. Luizia izan zen eremu horretan eta errepidea hondoratu egin zen. Maldaren egoera ezegonkorrak, azterketa sakonak eta alternatiba desberdinak aztertu beharra ekarri du. Konponketarako proiektua iaz egin ostean, lehiaketa publikoa egin zen eta obrak hasi dira orain. Sisitiaga errekako errepide zati hori konpontzeko 344.003,67€ko inbertsioa egingo du udalak eta lanak Altuna y Uria enpresak egingo ditu. Obrek lau hilabeteko iraupena izango dute, dena ondo bidean. 

"Errepidea erori zenetik, Azpeitiko Udala errepidea konpontzeko aukera ezberdinak aztertzen aritu da, maldaren egoera ezegonkorrak egoera konplikatua eragin baitzuen luiziak. Azterketek luizi handiagoa gertatzeko arriskua dagoela adierazten zuten, eta horregatik, errepidea itxita azterketa sakonak egin behar izan dira", adierazi du Aitor Bereziartua zinegotziak. 

120.000€ baserri bideak konpontzeko

Azpeitiko Udalak urtero landa eremuko baserri bideak konpontzeko diru partida bat jartzen du. 2023ko aurrekontuetan ere jarria du. 120.000€ baserri bideak konpontzeko bideratuko ditu; 60.000€ bideak garbitzeko eta 4.000€ seinalizazioa eta postontziak jarri, konpondu edo berritzeko. Baserri bideak konponduz landa eremuko bizilagunen segurtasuna eta irisgarritasuna hobetzea du helburu udalak.