Itzulpen automatikoa / Machine translation

Sorkuntza beken bidez, sei proiektu lagunduko ditu udalak

2024/07/03
Sorkuntza beken bidez, sei proiektu lagunduko ditu udalak

Hasi dira forma hartzen aurtengo Sorkuntza bekak. Aurkeztutako lan guztietatik sei aukeratu ditu epaimahaiak, eta, atzo, buruan dituzten ideia horien berri eman zuten sortzaileek beraiek Dinamoan egindako aurkezpenean. Diziplina ezberdinetako lanak daude aukeratutakoen artean, hala nola arte plastikoekin lotura dutenak edo ikus-entzunezkoak jorratu nahi dituztenak.


Azpeitiko Udalak 2017tik egiten du Sorkuntza beken deialdia. Urtez urte hazten joan dira, bai eskainitako baliabideei dagokienez, bai eskaintza aldetik ere. Izan ere, bekez gain, Dinamoan egonaldiak egiteko aukera ere ematen zaie gaur egun sortzaileei.

20.000 euro bideratuko ditu udalak aurten Sorkuntza beketara: 12.000 euro kultur sorkuntzaren modalitatera eta 8.000 euro kultur sorkuntzako egonaldien modalitatera. Hain zuzen, sei lanetatik lau kultur sorkuntza modalitatekoak dira eta gainerako biak egonaldietarako aurkeztutakoak.

Aukeratuko lanak (kultur sorkuntzaren modalitatea)

  • Ihintza Arakistain (Hot-weels). “Nire lana pinturan garatzen da. Nahiko nuke pintura hori, material desberdinen bidez, estudiotik ateratzea, instalazio bidez edo. Material birziklatua erabiltzen dut, eta kristalarekin ari naiz lanak egiten. Material bakoitzak eskaini ahal dituen gauza desberdinak probatu nahi ditut. Kristala, adibidez, gardena da, eta itzalekin jokatuz, eta argi-itzal horiek pinturaren gainean proiektatuz, sortzen diren kapa desberdinekin pintura formatu estadar horretatik kanpora atera nahiko nuke”.
  • Naomi Straub Viviane (Textile). “Hasita neukan prozesu bat jarraitu nahi dut. Nolabaiteko haserre ekologikotik hasi nintzen lan egiten hondakinekin. Deba eta Nerbioi ibaiertzetatik jaso ditut orain arte. Asko interesatzen zaidan material horretatik abiatuta, zerbait egin nahi dut, baina, horrez gain, gogoetarako aukerak ere uste baino handiagoak direla ikusi dut. Hor sartzen da, adibidez, baztertua izatearen gaia. Egin nahi dudana da ikusi zer gehiago egin dezakedan horrekin, eta landu fibrak, metodo tradizionalak (ehunak…). Eta nahi dut ez izatea nik bakarrik egingo dudan zerbait, baizik eta zerbait komunitarioa izatea”.
  • Ane Zapirain (Pasabide bat). "Iaz ere egonaldi bat egin nuen hemen (Alicia Rechacekin), eta bakarkako lan batekin nabil orain. Work in progress da oraindik. Nire desioa zen ikerketan sakon sartzea, baina azkenean beste formatu batean sartzea pentsatu dut: bideo-dantzan. Lagun batzuekin hitz egin nuen, eta Agorturekin (egilearen lana) aurrera jarraitzea pentsatu dut, baina emanez beste naturaltasun bat. Funtsean, Agortu izango da, baina film labur batean. Treneko bidaia baten moduan planteatu du. Dantza garaikidea, ikerketa eta bideoa izango da, baina batez ere da mugimendua".
  • Igor Rezola (Itxierak eta irekierak). "Nire praktikak bi lan ildo ditu nagusiki: alde batetik, grafiti edo postgrafitiaren zaku horretan sartuko genituzkeenak, eta, bestetik, lanaren mundua, lana modu zabal batean ulertuta, aktibitatea bera zein lanarekin lotura duten espazioak interesatzen zaizkit. Proiektuaren aitzakia izan zen testuingurua: Corrugados Azpeitiaren fabrika hor dago itxita. Hasieran nire ideia zen fabrika horretara sartzeko saiakera egitea, eta itxita dagoen edo produktiboa ez den espazio hori nolabait berriz ere produkzio gune bihurtzea. Jabetzen naiz oso konplikatua izango dela, baina saiatuko naiz. Beraz, nire lanak pinturarekin edo muralgintzarekin edo kaleko interbentzioarekin dauka lotura, baina era zabal batean ulertuta, pintura hedatu gisa ulertuta".

 Aukeratutako proiektuak (kultur egonaldien modalitatea)

  • Izaro Ieregi Gonzalez (La ira neumatica). “Aurkeztu dudan proiektua amorru femeninoaren inguruko ikerketa bat da. Beste bi ardatz ere baditu. Alde batetik, mugimendua eta ahotsa erabiltzeko ardatza, aldakak eta masailezurrak, amorrua gorputzaren alde horretan kokatzen baita. Orduan ideia da ardatz horretatik lan egitea. Beraz, izango da performance bat, eta mugimenduak eta ahotsa hortik abiatuko dira. Bestetik, beste ardatza izango da grabitatearen erabilera politikoa. Hau da, nola erabili dezakegun grabitatearen indarra eta gure gorputzaren egote hori nolabait eraldaketarako edo kexa gisa. Rosa Parksena izan daiteke adibide bat. Zazpi pertsonako talde batekin lan egingo dut, eta zuzeneko performance bat osatzea da asmoa".
  • Jon Saez Amorrortu (Marra). "Pinturan lan egiten dut gehienbat, baina, azkenaldian, koaderno lanetan eta marrazki lanetan ibili naiz gehiago. Beti eramaten dut nirekin, eta erabiltzen dut eskusa moduan. Nire ingurugiroan, nire paisaian ditudan elementuak hartzen ditut, pinturaren lengoaia horretan gehiago eta gehiago sartzeko. Nire ikerketa hori da: sartzea gehiago pinturen berezko lengoaia horretan. Dinamoko sorkuntza egonaldi hau eskatzean, nahi nuen ingurugiroa aztertzea eta ea marrazki lan horretan hemengo egonaldiarekin zer ateratzen zen ikustea. Marrazkia gehiago lantzea eta goraipatzea da asmoa. Paper luzeekin eta abar lan egin nahi dut".