Sormenari bide emateko aukera izango dute zortzi kultur proiektuk

Banatu dira 2023ko Sormen Bekak eta atzo aurkeztu zituzten. Bi sormen egonaldi eta 6 sorme beka banatu dira aurtengoan. Guztira 20.000€ bideratu ditu udalak kultur sormena bultzatzeko.

 Atzo aurkeztu zituzten aurtengo Kultur Sorkuntza Beken bidez garatzeko aukera izango diren proiektuak. Dinamoan bertan izan ziren Leire Goenaga zinegotzia, Garazi Lazkano Kulturazeko kidea eta sormen beka jaso duten sortzaileetako gehienak.

Leire Goenaga zinegotziak esker hitzak izan zituen aurkezpenean: “Beka jaso duzuenoi zorionak lehenik eta behin. Azpeitiko Udalarentzat kultur mugimenduan eta sorkuntzan eragiteko beka hauek oso garrantzitsuak dira. Sanagustin edo Soreasuko oholtza edo plazak eskaintzeaz gain, kultur disziplima desberdinetako sortzaile gazteei edo berriei esperimentaziorako baliabideak eskaintzen direlako. Beka honekin, alde batetik, behar materialei erantzuteko edo proiektari denbora eskaini ahal izateko baliabide ekonomikoak eskaintzen ditugu. Eta bestetik, azpiegitura eta laguntza edo aholkularitza eskaintzen dira”. Zehazki, aurtengoan 20.000€ bideratu ditu udalak kultur sorkuntza beketara.

Beka irabazten dutenek zein egonaldia egitea egokitzen zaienek Dinamoa sormen guneko baliabide guztiak eskura dituztela gogorarazi zien eta “kultur arloan bidelagun ditugun Kulturaz kooperatibako kideen laguntza. Ezinbestekoa da hauek egiten duten lana, eta hori ere eskertu nahi dut gaurkoan”.

Disziplina desberdinak lantzeko sei beka

Iosu Azkue azpeitiarrak neurri naturala izango duen eskultura bat egitea du helburu bekarekin.Azpeitiko emakumeak omendu eta egin izan dituzten zaintza lanak errekonozitzea du helburu.

Felipe Murillo azpeitiarrak harremanen inguruko eleberri bat idatziko du bekarekin. Gizontasunaren inguruko artefaktu bat, aitatasunaren errebisio bat, maskulinitatea eta zaintzaren arteko zubiak eraikitzeko aitzakia bat… Harremanak arakatzeak hainbat ertz eskainiko ditu eta protagonistak hainbat gorabeherei egin beharko die aurre. Istorio bat ontzea izango da sorkuntza bekak bermatuko diona eta idatzita jasoko duen istorio horri soinu-banda bat eraikitzen saiatuko da, nolabait irakurleak bisuala izango den estimulutik haratagoko gehigarriak izan ditzan.

Paula Huartek Esquejes proiektua eramango du aurrera. Zeramika lantzen du eta loturan, irudien segidan oinarritutako eraikuntza-modu bat planteatzen du. Normalean instintiboki gertatzen den ekintza baten garapen kontzientea. Geldialdi bat obra baten sortze-prozesuan, aldi berean beste baten sorburu bihurtzen dena.

Enok Sudupe azpeitiarraren Hau holaxeenk proiektua irudimenetik ekintzetara pasatzeko proposamena da, herriko kontuak abiapuntu hartuz. Ekintza plan bat diseinatu eta exekutatzea du helburu. Izen berarekin 2013-2020 artean Uztarria aldizkarian publikatutako eta argitaratu gabeko irudi batzuk gorpuztuko ditu.

Usua Martinezek pertsonaia finko batzuei buruzko kontakizunak egitea da asmoa komiki tira edo tebeo formatuan. Alison Bechdelen Dykes to watch out for hartuko du erreferentzia bertan bollera komunitate baten bizipenak eta tirabirak kontatzen ditu.

Patxi Juaristi azpeitiarrak Hormatik zuntzera proiektuan stencil edo txantiloi teknika erabiliz jorraturiko ibilbidea zuntzera bideratzea da helburua. Spray eta txantiloietatik haratago, serigarfia, tinta, grafito eta akrilikoa bezalako material eta teknikak parper, kartoi, mihise-erako euskarrietan aplikatuz. Irudiak lantzeko euskaldunen iruditegian dauden sinboloak eta elementuak, beren karga historiko, sozial eta politikotik askatu eta beste leku batean kokatu nahi ditu. Errealitatea eta fikzioa nahastuz inguruak nola nahasten diren ikusteko.

Bi egonaldi ere bai
Iker Gozategik garrasiaren bilakaera eta aldaera ezberdinen ikerketa egingo du Dinamoan egingo duen sorme egonaldian. Bizkarreratzen dugun historia, kultura, arraza edo genero ikuspuntuetatik ezberdinak dira garrasi ohiturak, baina gizaki zein animalia gehienak batzen gaituen kontzeptu unibertsala da orrua egitearena. Horrela bada, ikerketa honekin kontzeptu zabal honen diziplina arteko itzulera bat osatu nahi du.

Oihuka dabilen aurpegi baten itxura, laguntza eske dabilen garraxia edonork erraz identifika ditzakeen formak direla baliatuz garrasi ezberdinen dokumentazio lan bat egitea du helburua. Bideo, irudi eta soinu bidez gorputzaren gaitasun fisikoak baliatuta.

Leire Lakunzaren Laino zerratu bat proiektuaren helburua Soreasuko Sebastian Parrokian zuzeneko argi- eta soinu-esku-hartzea egitea da. Eliza horren arkitekturan eta aurkitu berri diren Bakardadearen Kaperako pintura errenazentistetan oinarrituta, espazio horretan irudikatzen diren eszenez bestelako narratiba bat sortu nahi du, elizaren zati batzuk argi-foku batekin edo gehiagorekin argiztatuz eta beste zati batzuk ilunpean ezkutatuz.