Sormenerako lekua, igerilekuan

Badira hilabete batzuk igerilekuak sorkuntzarako espazioa ere ba duela. Udazkenean jarri zen martxan, eta dagoeneko hiru erakusketa izan dira ikusgai: Arte eta Diseinuko ikasleena, Mari Jose Etxaniz Garairena eta Miren Artetxe Eizagirrerena. "Interesgarria iruditu zaigu kirola egiteko espazioan ere, espresio-plastikoari nolabaiteko keinua egitea. Finean, biek hala biek, aisialdi-denboran, emozioak ateratzeko eta gizarteratzeko erabiltzen ditugun baliabideak baitira", adierazi du Egoitz Arruti Kirol Batzordeburuak. Beraz, ekimen honen bidez, bi adierazpen mota horien arteko elkarbizitza erraztu nahi da. Horretarako, hasiera batean, igerilekuko sarrera ondoan dagoen egongelan, lanak aurkezteko espazioa egokitu da. 

Hainbat ideia daude erakusketari begira, adibidez, zenbait hilabetetan, epe batez, gai baten inguruan edozein sortzailek bere lanak erakutsi ahal izango ditu. Gaiei dagokionez, asmoa da, lanek adierazten duten mezuak kirolarekin, mugimenduarekin eta gorputzarekin lotura izatea. Teknikari dagokionez, hasiera batean bederen, ateak zabalik utzi nahi zaizkio sortzaileari; horrela, posible izango da oleoa, akuarela, arkatza… bidez eginiko lanak erakustea.

Udal kirol zerbitzutik, ekimen honetan parte hartu nahi duen orok igerilekuko sorreran bertan galdetu dezake edo zerbait zehatza badu buruan eskaria bete dezake.