Sortzetiko kardiopatien sentsibilizazioan eragiteko, Azoka Plaza gorriz

Sortzetiko Kardiopatien Nazioarteko Eguna izaten da otsailaren 14a, eta Azpeitiko Udalak, Bihotzez elkartearekin bat eginez, Azoka Plaza gorriz argiztatuko du, gaur, 18:00etatik gauerdira bitartean.

Araban, Bizkaian eta Gipuzkoan 175 haur inguru jaiotzen dira urtean sortzetiko kardiopatiarekin, eta horiei laguntzeko elkartea da Bihotzez. Sortzetiko kardiopatiaren intzidentzia handia izan arren, oraindik ere ezezaguna da gaia. Azoka Plaza gorriz argiztatuta, sentsibilizazioa sustatzen lagundu nahi du udalak.

Bihotzez elkarteak zehaztu duenez, sortzetiko kardiopatiak ez dira bihotzeko arazoak soilik, eragin handia izan dezakete haurren eta haien familien bizitzako eremu askotan: maila emozionalean, hezkuntza-etapan, familian edo garapen neurologikoan, besteak beste.