Tokiko ekonomia, berdintasuna, digitalizazioa eta jasangarritasuna bultzatzea dute helburu Sustapen Ekonomikorako laguntza berrituek

Atzo, martxoak 2, egin zuen udalbatzak hileko plenoa, eta, besteak beste, ekonomiaren sustapenerako laguntzen oinarriak eta deialdia onartu ziren, behi-behinean. Hiru laguntza lerro izango ditu dirulaguntzak: lehen sektorera eta merkataritzara zuzendutakoak 100.000 euroko diru poltsa izango du; industria proiektu estrategikoei eta berritzaileei, garapen jasangarria bultzatzen duten proiektuei eta genero berdintasun planak egiteko lerroak 110.000 euro izango ditu; eta ekintzailetasuna sustatzeko 40.000 euro jarriko ditu. 

Nagore Alkorta alkateak Sustapen Ekonomikorako laguntzak "egoera ekonomiko zehatz bati" erantzuteko sortu zirela 2013an gogorarazi zuen: "Urte haietan langabezia tasa %17a izatera ere iritsi zen. Testuinguru horretan proiektu industrialak laguntzea lehenetsi zen, kontratazioa bultzatzeko.  Orain, beste bat da egoera, eta laguntza hauek egokitzeko hausnarketa egin beharra zegoen", azaldu du. Hala, 2019an, laguntzak egokitzeko lanketa egin da eta merkataritza eta lehen sektorera bideratutako laguntzaren deialdia egin zen. 

2020an, laguntzak egokituta,  hiru laguntza lerro izango dira berriro: lehen sektore eta merkataritzara bideratutakoa; industriara bideratua eta ekintzaileei zuzendurikoa. Aldaketak, industriara bideratutako lerroan egin dira, gehienbat. 

Jasangarritasuna eta berdintasuna

Langabezia tasak onera eginagatik, datu horien atzean begiratu eta neurriak hartzea beharrezkoa da alkortaren hitzetan: "Herriko langabezia tasa %8 inguruan dabil azken hilabeteotan eta uste dugu momentu egokia dela salto kualotatibo bat eman eta neurri berriak hartzeko lanaren kalitatea hobetzeko edo emakumeen kontratazioa bultzatzeko". Izan ere, %8ko tasa horretan arreta jarrita, emakumeen langabezia tasa gizonenaren ia bikoitza dela ikusten da: "Emakumeen kontratazioa eta industria mundura sartzea ahalbideratzeko momentu egokia dela uste dugu", gaineratu zuen. 

Bide horretan, 2020an industriara bideratutako lerroan lau kontzeptutan emango dira laguntzak: proiektu industrial eta berritzaileak eta interes publikokoak garatzeko; jasangarritasuna bermatzeko inbertsiotarako; jarduera berrietarako eta berdintasuna bultzatuko duten berdintasun-planak eta inbertsioak egiteko. Eta, batez ere, 49 langile baino gutxiagoko enpresei laguntzea da helburua. 

Agerraldi publikoan, 30egunez

Ekonomia sustatzeko dirulaguntzen oinarri orokorretan hainbat egokitzapen eta aldaketa egin dira laguntzak berritzean, eta, beraz, 30 lan egunetan agerraldi publikoan egongo dira. Epe hori pasatuta, alegaziorik ez bada behin betikoz onartuak izango dira eta 2020ko deialdia publikatu eta martxan jarriko du.