Txakolin zaporeko larunbat eguerdiartea

Aurreko urteetan baino astebete lehenago, larunbat honetan (ekainak 7) egingo dute VIII. Getariako Txakolinaren Eguna. Beste behin ere, Perez Arregi plazan jarriko dituzte postuak, 12:30etik 14:30era bitartean, eta zortzi upategitako txakolina dastatzeko aukera izango da.

Gaur egin dute egunaren aurkezpena Azpeitiko Udaleko eta Getariako Txakolina sor markako ordezkariek, eta larunbatean plazan izango diren gaztagileek eta Azpeitiko Gaixo eta Elbarrien Aisialdi Taldeko kideek. Talde hori arduratuko da pintxoak banatzeaz.

Bost euroan, bost txakolin aukeran

Bost euroren truke, kopa eta bost txakolin probatzeko aukera egongo da. Txakolinari laguntzeko, berriz, herriko gaztagileen gazta pintxoak ez ezik, Eusko Labeldun pintxoak ere egongo dira (Lumagorri oilasko pintxoak eta Basatxerri txerriki pintxoak). Giroa alaitzeaz Bankako Menditarrak taldea arduratuko da.

 Parte hartuko duten upategiak

• Aitaren
• Ameztoi
• Arregi
• Blai
• Erlete Goikoa
• Flysch
• Mokoroa
• Ulacia