'Txipa ipintzeko garaia iritsi zaigu' kanpaina abian da

Azpeitiko Udalak, Zestoako eta Azkoitikoarekin batera, txakurrei txipa jartzeak dituen onurak agertu eta jabeek dituzten betebeharrak gogorarazteko 'Txipa ipintzeko garaia iritsi zaigu' kanpaina jarri dute abian. Aitor Bereziartuak txakurrei txipa jartzeak bi onura dituela azpimarratu nahi izan du aurkezpenean: "Alde batetik, txipa duten eta erregistratuta dauden txakurrak etxeko aseguruan sartuta daude, beraz, ezbeharren bat gertatzean asegurua egiten da kargu. Beste aldetik, berriz, galdutako txakurren kasuan, txipa dutenak epe motzean jabeei itzultzen zaizkie; ez da gauza bera gertatzen txipik gabekoekin". Udal arduradunez kontrolerako baino onurarako neurri bat dela txiparena adierazi dute. 

Txipak dituen onurak azaltzeaz gain, ordea, txakur jabeek beste hainbat betebehar ere badiztuztela azpimarratu dute. Txakurrak kalean lotuta eman behar dela eta gorotzak jasotzea ezinbestekoa dela adierazi dute. Hiru udaletako ordezkariak bat egin dute kexak jasotzen dituztela azaltzean, baina jabe askok arduraz jokatzen dutela ere gaineratu dute.

Datuen arabera, herriaren biztanleriaren %10ak dute zakurra. 

Txipa jartzearen garrantzia azpimarratzeaz gain, txakurrak hiltzean baja eman behar dela ere zehaztu dute. Hala, albaitariari txakurra hil dela adieraztearekin nahiko da tramitea egiteko. 

Eskuorria etxeetara

Gaiaren inguruan informazio gehiago nahi dutenek hiru herrietako udaltzaingora jo daiteke: Azpeitiko udaltzaingoa: 943 15 13 13. Horretaz gain, datozen egunotan eskuorri bat banatuko da herriko etxe guztietara.