Udal Musika Bandak eta Udalak hitzarmena sinatu dute herrian musika sustatzen jarraitzeko helburuz

Azpeitiko Udal Musika bandak eta udalak hitzarmena sinatu dute beste urte batez. Hitzarmen honen bidez urte osoan zehar egiten duen lana sustatu eta bultzatu nahi du udalak. Komunitatearen garapena eta kulturartekotasuna bultzatzeko, kultura sorkuntza babesteko eta Azpeitiko musika programazioa aberastea du ardatz sinatutako hitzarmenak. Hitzarmenaren sinaduran izan dira Julen Agirrezabala eta Julen Carrizo bandako kideak eta Mikel Odriozola festetako batzordeburua eta Ainara Larrañaga festetako zinegotzia.
Udal musika bandak hamarkada ugari daramatza musika-tradizioaren berreskurapena sustatzen eta musikaren arloa aberasten bere ekintza eta kontzertuen bidez. Herriko kultur agenda aberasten du, gainera, festa zein bestelako egun seinalatuetan, eta hori eskertu nahi izan die udal arduradunek bandako kideei.