Udan ere, kirol eskaintza oparoa
2024/05/20
Azpeitiko Udal Kirol Patronatuak osatu du 2024ko udako jardueren eskaintza. Uztailean eta irailean, eskaintza zabala eskainiko du igerilekuan. 4-13 urte bitartekoentzako ikastaro trinkoez gain, bestelako jarduerak ere izango dira. Izen-emate guztiak maiatzaren 27tik 31ra izango dira.
Umeentzako ikastaro trinkoak uztailaren 1etik 19ra eta irailaren 9tik 27ra izango dira, astelehenetik ostiralera, egunero. Umeentzat ez ezik, gainerako herritarrentzat ere jarduera ugari eskainiko dira. Uztailerako, irailerako edo bi hilabetetarako eman daiteke izena.
Ikastaroetan gehienezko pertsona kopurua gainditzen den kasuetan, zozketa egingo da. Bestela, epea amaitu ondoren ere izena emateko aukera egongo da, taldeak bete arte. Izen-emate orriak harreran jaso daitezke.
Eskaintzaren inguruko zalantzak edo informazio gehiago nahi izanez gero, joan igerilekuko harrerara edo deitu 943814121 telefonora.