Urrestillako kaskoko berrurbanizaziorako proiektua ezagutu eta ekarpenak egiteko aukera izan dute bizilagunek

Atzo arratsaldean, Urrestillako Kaletxiki, Kaleaundi eta ingurua berrurbanizatzeko proiektua aurkeztu zien udalak Urrestillako bizilagunei. Aitor Bereziartua hirigintza zinegotzia izan zen bertan azalpenak eman eta ekarpenak jasotzen.

Bileran 15 lagunetik gora elkartu ziren eta Bereziartuak azaldu zien nondik sortu zen proiektua: “Eskaera desberdinak genituen Urrestillako erdigunean eta horiei erantzun ahal izateko eta irisgarritasuna hobetzeko helburuz berrurbanizazio proiektua egitea erabaki genuen”. Azoroko auzoko bileran aurreratu zuen proiektua egiten ari zela udala, eta han adierazi bezala, proiektua egin baina bukatu aurretik ekarpenak jasotzeko bilera egin da.

Proiektuan jasotakoaren arabera, Kaletxikiaren izaera mantenduko da. Hau da, galtzada-harrizkoa izaten jarraituko du; baina, irisgarritasuna hobetzeko lur osoa aldatuko da. Kalearen erdian harri txikia jarriko da eta espaloi gisa harri- zabal handiak. Lan horietako obrekin batera ur hornidura eta bestelako sareen azpiegiturak berrituko dira eta etxe-atari eta lokaletako sarrerak berdintzen ere ahaleginduko dira. Kaleaundiri dagokionez, azpiegitura sareak berrituko dira eta asfaltatu egingo da, kalearen goikaldean pasabide jasoa egingo da ibilgailuen abiadura murrizteko helburuz.

Plazari dagokionez, ordenazio beharra azpimarratu zen bileran. Hala, Aratz-errekatik datozen autoen paso naturala Kaleaunditik gorakoa izatea lortu nahi da. Horretarako, eliza aurre ingurua eta kale barrenaren hasiera peatonalizatzea aurreikusten da. Eremu horretan, lurzoru kota berdintzeko beste hainbat neurri ere hartuko dira. Zubi gaina berritu eta ibai ertzeko paseoa kalearen amaieraraino luzatu eta presarako oinezkoen bidea erraztu eta seguruagoa izateko zebrabidea ere egingo da.

Jasotako ekarpenak aztertu eta datozen hilabeteetan proiektua osatuta izatea aurreikusten duela udalak. Modu horretara datorren aurrekontuetan proiektua sartzeko.