Urrezko aizkolarien finalean lehia estua izango da larunbatean, Izarraitz frontoian

Dena prest dute Urrezko Aizkolarien Binakako Txapelketako finala larunbat arratsaldean, 18:30etatik aurrera Izarraitz pilotalekuan jokatzeko. Jesus Mari Mujika eta Iker Vicente, Mikel Larrañaga eta Jon Rekondo eta Julen Alberdi Txikia IV.a eta Ugaitz Mugertza izango dira aurrez aurre, lehia estuan. "Horrelako lehia bat herrian izatea ohorea" dela azpimarratu du Egoitz Arruti Kirol Batzordeburuak. Eta jendea "espero den lehia estua ikustera" animatu nahi izan du. Luis Mari Bengoa antolatzaileak, esker hitzak izan ditu: "23 urte dira Azpeitian finalak antolatzen hasi ginela, lehenengo banakakoa izan zen, eta azken 20 urteotan banakakoa eta binakakoa. Ez naiz nekatuko urte guzti hauetan Udalak erakutsitako babesa eskertzen".

Finalistek bost lan egin beharko dituzte finalean. Lehenengo lana, bikoteko aizkolari batek 45 ontzako egurra ebakitzea, erlojuaren aurkako, izango da. Ondoren, zutikako kanaerdiko enbor bat ebaki beharko dute txanda librean. Horren ostean, 65 ontzako egurra ebakiko dute bien artean. Segidan, bikoteko partaide batek 45 ontzako enborra moztuko du lehenik, eta bukatzean, haren bikotekideak etzandako kanaerdikoa ebakiko du. Bukatzeko, berriz, lau kanaerdiko, lau 60 ontzako eta bi 65 ontzako ebaki beharko dituzte txanda librean.

Urrezko finalen jaialdia

Emakumeen Urrezko Banakako Aizkolari , Urrezko Harrijasotze Txapelketa eta  19 eta 23 urtez azpikoen binakako aizkolari txapelketen finalak ere izango dira Izarraitzen. Emakumeen Urrezko Banakako Aizkolari Txapelketan, Nerea Sorondo, Irati Astondoa eta Maika Ariztegi ariko dira elkarren aurka. Urrezko Harrijasotze Txapelketan, berriz, Xabier Peñagarikano, Urdax Magunazelaia eta Aimar Galarraga izango dira aurrez aurre. 23 urtez azpikoen Urrezko Binakako Aizkolarien Txapelketan, Ioritz Gisasola Zelai IV.a eta Suharri Rodriguez, Julen Larrea eta Jokin Urretabizkaia eta Hodei Ezpeleta eta Unai Zabalak jokatuko dute norgehiagoka. Eta 19 urtetik beherakoen txapelketan, Axel Larrañaga eta Markel Zapiain Oier Larretxearen eta Endika Goiaren kontra arituko dira

Bi sarrera bikoitz zokatuko ditu Udalak

Finalerako bi sarrera bikoitz zozkatuko ditu Azpeitiko Udalak. Zozketetan parte hartu nahi dutenek, gaurtik ostiralera bitartean bihar (martxoak 6) 12:00ak arte eman dezakete izena udaletxera deituta (943 15 71 85) edota udalzozketak@azpeitia.eus helbidera idatzita. Izen abizenez gain, harremanetarako telefono bat utzi beharko dute parte hartzaileek.

Sarituei, ostiral eguerdian bertan abisatuko zaie.