Zuhaitzak landatuz, ingurumen-kontzientzia hartzen

Azpeitiko Ekoetxeak antolatuta, Zuhaitz Eguna egingo dute, otsailaren 16an (igandea), Goenako zelaian. Parte hartzen dutenek zuhaitzak landatzeko aukera izango dute, ingurune osasungarriago eta iraunkorrago bat sortzen laguntzeko; horrez gain, hainbat zuhaitz-espezieri buruz gehiago ikasteko eta indartsu haz daitezen nola zaindu ikasteko aukera izango dute. Urola Bizirik taldeak Madalena Auzoan duen haztegitik hartuko dira Goenan landatuko diren zuhaitzak.

“Esperientzia dibertigarria eta hezitzailea izateaz gain, jarduera hau ingurumen-kontzientzia eta talde-lana sustatzeko modu bat da”, esan dute Ekoetxeko kideek. 10:00etatik 12:00etara izango da landaketa. Lanak amaitzean, hamaiketako txiki bat ere egingo dute parte hartzaileek elkarrekin.

Herritar guztiak animatu dituzte parte hartzera. Informazio gehiago nahi dutenek 943812448 telefonora dei dezakete. 

Izena emateko lotura