Euskal Herriko mugimendu lesbikoaren genealogia bisuala, erakusketa batean

Erakusketak Euskal Herriko mugimendu lesbikoaren genealogia bisual bat erakusten du, iraganeko eta gaur egungo borroken eta erreferenteen ibilbidea jasoz. Irekiera ekitaldia apirilaren 20an izango da, 18:30ean, Sanagustin kulturgunean. Bertan, Marta Luxanek, erakusketaren egileak, bisita gidatua eskainiko du. Ondoren, apirilaren 20tik 27ra bitartean egongo da ikusgai.

Berdinduren zerbitzu ibiltaria, Azpeitian

Bestalde, LGTBI+ komunitateari zuzendutako baliabideak herritarrengana hurbiltzeko asmoz, Berdindu zerbitzu ibiltaria Azpeitiko Emakumeen Txokoan izango da apirilaren 21ean. Eusko Jaurlaritzaren zerbitzu honek informazioa, orientazioa eta arreta eskaintzen die lesbiana, gay, trans, bisexual eta intersexualei, baita haien ingurukoei ere.

Azpeitian eskainiko den arreta presentziala 10:00etatik 13:00etara eta 16:00etatik 19:00etara izango da. Zerbitzua identitate eta orientazio sexualari, legediari edo aniztasun sexualaren inguruko edozein zalantza argitu nahi duen herritar orori zuzenduta dago.

Informazio gehiago eskuratzeko, Berdindurekin harremanetan jar daiteke doako telefono zenbakien bidez (900 840 128 / 688 769 865) edo posta elektroniko bidez: berdindu.gipuzkoa@euskadi .eus